Општина Богданци одбележува 30 години постоење

Со повеќе настани распоредени во три дена, почнувајќи од утре, Општина Богданци ќе прослави 30 години од своето  постоење.

Утре од 9:00 до 13:00 часот, во рамките на тридневната програма, се уличните трки, како и натпреварите во одбојка и во кошарка, кои ќе се одржат во Градскиот парк, како и во салата на СОУ „Бограднци“. Во 17:30 часот е поетското читање, кое ќе се одржи во малата сала на ЈОУДК „Бранд Петрушев“, а во 19:00 часот е четвртиот меѓународен фолклорен фестивал „Разиграни младости“, во спортската сала „Млаз“.

В сабота, од 10:00 до 11:00 часот, ќе има свечено положување цвеќе на бистите на паднатите борци, а од 19:30 до 20:00 часот – свечена академија во ЈОУДК „Бранд Петрушев“, по што ќе следува коктел-забава. Вечерта ќе биде заокружена со музичка програма од 20:30 до 03:00 часот, во Градскиот парк, во рамките на која ќе настапат Јована Тасева, Стојановски брадерс, Ѓоко Таневски и диџеј.

И последниот ден, недела, е резервиран за фестивалот на улична храна, кој ќе се одржи во Градскиот парк, од 10:00 до 12:00 часот, а во чии рамки ќе се вари слатко од смокви, а ќе настапи и танцовото студио „Свит денс“. Потоа ќе има ликовна работилница на отворено, во рамките на која ќе се сликаат мотиви од Богданци и на крајот од 18:30  до 20:00 часот ќе се одржи футсал-натпревар меѓу екипите на Богданци и Калиновац, во спортската сала „Стојаково“.