Во рамките на проектот за регионално управување со цврст отпад, во Општина Прилеп, ЈКП „Комуналец“ почна со поставување нови контејнери за мешан комунален отпад и контејнери за селекција на отпадот, со што се заменуваат старите и дотраени садови.
Во рамките на проектот, од Министерството за животна средина и просторно планирање, Општина Прилеп доби 126 контејнери за фрлање отпад по принципот на сува и влажна фракција.
– Новите контејнери претставуваат значаен чекор кон подобрување и реализација на воспоставениот современ и ефикасен систем за управување со отпадот, имплементиран во Општина Прилеп, со цел подобрување на јавната хигиена, заштита на животната средина и подигнување на квалитетот на животот на сите граѓани. За да продолжи да функционира системот успешно, неопходна е активната поддршка и, пред сè, одговорност на секој граѓанин – потенцираат од ЈКП „Комуналец“.
Од претпријатието објаснуваат дека во зелените контејнери за мешан комунален отпад се фрла отпад што не може да се рециклира.
– Во контејнерите за селекција се фрла само отпадот за кој се наменети: пластика, лименка, најлон, хартија, картон и друга амбалажа, согласно со ознаките поставени на контејнерите. Секоја амбалажа го има унифицираниот знак за рециклирање, кој треба да се следи. Отпадот треба да биде фрлен во внатрешноста на контејнерот, а не покрај него. Не треба да се остава градежен, кабаст или друг отпад што не е предвиден за овие садови, кои веднаш се оштетуваат по фрлањето недозволен отпад – велат од ЈКП „Комуналец“.
Притоа, наведуваат дека со притискање и преклопување на картонските кутии и на пластичната амбалажа, се овозможуваат поголем капацитет и поефикасно собирање на отпадот.
– Ова најмногу треба да го практикуваат бизнисите, кои исфрлаат големи количини картонски отпад, но и граѓаните во домашната канта за селекција – потенцираат од претпријатието.
Оттаму додаваат дека со правилна селекција, секој придонесува за зголемување на рециклирањето, намалување на количината отпад што завршува на депониите, почиста и поздрава животна средина, поефикасно идно регионално депонирање на отпадот и за спречување во безмилосното искористување на природните ресурси.
Јавното претпријатие ги замолува и повикува сите граѓани совесно да ги користат новите контејнери, да ја почитуваат нивната намена и да дадат придонес за почист, еколошки град, а титулата зелена општина, како што нагласува, да се почитува и носи со гордост.
