Децата и младите во Гевгелија ќе изработуваат керамички предмети и ќе учат англиски јазик   

И во текот на летниот распуст, културните институции во Општина Гевгелија продолжуваат со организирањето бесплатни едукативни и креативни активности, овозможувајќи им на децата и на младите квалитетно исполнување на слободното време преку учење, дружење и развивање на нивните таленти.

Во организација на Пионерскиот дом „Јосип Броз Тито“, од 29 јуни до 6 јули 2026 година ќе се реализира школата за керамика, под менторство на Гордана Николоска-Петрова, академска вајарка и музејски копист.

– Активностите ќе се одржуваат секој работен ден од 11:00 до 12:00 часот, во просториите на Пионерскиот дом. Преку практична работа со глина, учесниците ќе имаат можност да ги развиваат својата креативност, рачните вештини и уметничкиот израз, изработувајќи уникатни керамички предмети и запознавајќи се со основните техники на керамичката уметност –  соопштија од  Општина Гевгелија.

Паралелно со тоа, Домот на културата „Македонија“ во Гевгелија организира бесплатна летна секција „Учиме англиски преку игра“, која ќе се реализира од 29 јуни до 3 јули, 2026 година, секој ден од 10:00 до 11:00 часот, во просториите на Народниот театар во Гевгелија. Секцијата ќе ја води Вилма Стамкова, која преку едукативни игри, натпревари и интерактивни активности ќе им помогне на учениците на интересен и забавен начин да го збогатат англискиот вокабулар, да ги усовршат јазичните вештини и да стекнат ново знаење во поттикнувачка и креативна атмосфера.

– Со ваквите бесплатни летни програми, културните институции во Гевгелија уште еднаш ја потврдуваат својата посветеност кон создавањето квалитетни содржини за најмладите. Преку различни уметнички и едукативни активности, децата и младите ќе имаат можност да го поминат летниот распуст активно, креативно и исполнето, стекнувајќи нови знаења, вештини и пријателства – потенцираат од локалната самоуправа.