Неколку опции за Леброн Џејмс и неговото последно танго?!

Кариерата на Леброн Џејмс полека влегува во самата завршница, а претстојното лето би можело да биде едно од најважните во неговата блескава кариера. Иако и понатаму е еден од најдобрите кошаркари во НБА лигата, сè повеќе се поставува прашањето каде ќе ја продолжи кариерата и дали следната сезона можеби ќе биде неговата последна.

Според американскиот новинар Марк Штајн, интерес за Леброн и понатаму има од повеќе франшизи, но реалноста е дека мал број клубови навистина можат да си дозволат да го доведат. Причината не е само возраста на легендарниот кошаркар, туку и финансиските ограничувања со кои се соочуваат речиси сите тимови што сонуваат за негов потпис.

Како една од најинтересните опции повторно се споменуваат Голден стејт. Идејата Леброн конечно да игра заедно со Стеф Кари со години е сон на НБА навивачите, особено по нивните спектакуларни дуели во финалињата. Сепак, проблемот е во буџетот, бидејќи „воините“ имаат ограничен простор и тешко можат да создадат услови за голем договор.

Во игра повторно е и Кливленд, клубот каде Леброн ја испиша најемотивната страница од својата кариера. Во 2016 година тој му ја донесе единствената титула на Кливленд и засекогаш стана херој во Охајо.

Меѓу потенцијалните дестинации се споменува и Њујорк. Леброн никогаш не ја криел љубовта кон „Медисон Сквер Гарден“, но Никси во моментов имаат стабилен тим и одлична хемија, па останува дилемата дали би ризикувале да ја нарушат структурата за играч кој е во последните години од кариерата.

Интересна приказна е и Лос Анџелес Клиперс. Во тој случај Леброн не би морал да го менува градот, а повторно би соработувал со тренерот Тајрон Лу, со кого ја освои титулата во Кливленд. Но, многумина се сомневаат дали Клиперс навистина имаат шампионски потенцијал.

Поради сите овие околности, сè пореално изгледа сценариото во кое Леброн ќе остане во Лос Анџелес Лејкерс. Иако тимот имаше проблеми со формата, повредите и нестабилноста, Џејмс повторно покажа дека и на 41 година може да биде лидер на екипа која се бори за плејоф.

Дополнително, сè почесто се споменува и можноста за пензионирање. Луѓе блиски до НБА веруваат дека е многу поверојатно Леброн да одигра уште само една сезона, отколку да продолжи уште неколку години. Тоа значи дека лигата би можела да влезе во голема „проштална турнеја“ на еден од најголемите спортисти во историјата.

Интересно е што една опција би можела целосно да ја промени ситуацијата. Доколку Леброн реши да игра за ветерански минимум, тогаш практично секој тим во НБА би можел да влезе во трката за негов потпис. Во тој случај, Кралот би имал можност сам да ја избере идеалната средина за последниот предизвик во кариерата.

Иако бројките му се најниски во последните две децении, тие и понатаму изгледаат неверојатно. Оваа сезона Леброн бележеше 20,9 поени, 7,2 асистенции и 6,1 скока по натпревар со над 51 проценти успешност во шутот. Она што го прави на овие години никогаш досега не е видено во НБА.

Без разлика каде ќе заврши, едно е сигурно – светот на кошарката полека се подготвува за моментот кога Леброн ќе каже збогум, а кога ќе замине Кралот, ќе заврши една од најголемите ери во историјата на спортот.