Градоначалникот на Општина Центар, Горан Герасимовски, денеска им ја предаде во употреба градинката „Пролет“, во истоимената населба, на најмладите жители што живеат во овој дел од градот.
Овој објект е дел од градинката „Раде Јовчевски-Корчагин“ и, како што истакна Герасимовски, е најмодерна, најурбана и најевропска градинка во државата.
– Темелите на оваа убава приказна беа поставени во 2022 година, пред неполни три години. Изградена е и опремена за помалку од три години. Градинката „Пролет“ се простира на површина од 3.200 квадратни метри, со девет занимални и е со капацитет да прими 173 дечиња. Топло и безбедно катче, оформено според сите стандарди. Изградена за 900 евра за квадратен метар, по потпросечна цена, оваа градинка е пример за тоа што може да се постигне кога се има заедничка цел – нагласи Герасимовски, додавајќи дека објектот е симбол на заедничката посветеност и на грижата за најмладите.
Лидерот на СДСМ, Венко Филипче, додаде дека овој целосно нов објект ќе ги задоволи огромните потреби на граѓаните што живеат во овој дел од градот.
– Ова не е само објект туку и место каде што ќе се всадуваат нови пријателства, место каде што децата ќе ги прават првите чекори кон образованието, светот на креативноста – истакна Филипче.
Изградбата на градинката е целосно финансирана од Општина Центар и чини околу 3 милиони евра.
(А. П.)
