Истрагата во Обединетото Кралство утврди дека новороденче, чии посмртни останки биле пронајдени завиткани во весник од 1910 година, било жртва на убиство. Истражниот судија потврди дека непознато лице го задавило детето со врвка врзана околу неговиот врат, пренесува „Гардијан“.
Истражниот судија Криспин Оливер го опиша случајот како необичен од правен и доказен аспект, како и како многу тажна и единствена приказна. „Јасно е дека му се случило нешто страшно на беспомошно дете. Тоа се случило во нашата заедница, но пред повеќе од еден век. Трогателно е да се види како јавноста и поединци од оваа област реагираа и постапија правилно во врска со ’Бебето Окленд‘“, рече Оливер.
Откритие за време на реновирање
Скелетот на бебето, познато само како „Бебето Окленд“, беше пронајден на 29 јули 2024 година, за време на реновирање на куќа од крајот на 19-тиот век во Бишоп Окленд. Сопственикот на куќата, Питер Муди, ги открил останките додека поставувал нов под на вториот кат. Во својата изјава тој објасни дека ги забележал откако подигнал една подна даска, по што стапил во контакт со локалните власти, бидејќи не бил сигурен дали веднаш треба да ја извести полицијата.
Детективот и главен инспектор Мел Садерленд на сослушувањето раскажа дека бил на должност кога пристигнала пријавата за откривањето на скелетот. Откако било потврдено дека останките се човечки, куќата била запечатена за да се обезбеди местото на настанот до пристигнувањето на форензички антрополог. Форензичарката д-р Микол Зупело пристигнала истата вечер и поминала два дена пребарувајќи ја куќата.
Причината за смртта остана непозната
Форензичката анализа утврдила дека скелетот бил речиси целосен и делумно мумифициран. Датирањето со јаглерод покажало само дека бебето починало некаде помеѓу 17-тиот век и 1955 година.
Аутопсијата ја извршиле д-р Зупело и патологот д-р Луиз Малкахи. Според наодите, бебето било во гестациска возраст меѓу 38 и 40 недели. Не биле пронајдени знаци на трауматска повреда, но околу вратот била обвиткана врвка. Патологот објаснил дека врвката била обвиткана околу вратот трипати, врзана во јазол, а потоа повторно обвиткана.
