Модернизирање на училиштата во Кисела Вода

Општина Кисела Вода континуирано вложува во создавање на современи услови во училиштата, преку редовни инфраструктурни подобрувања и модернизација на објектите.

Оттаму велат дека во изминативе неколку месеци се работело на повеќе градежни зафати, реконструкции и набавка на опрема, со единствена цел да се унапреди квалитетот на наставата за секој ученик.

-Во ООУ „Партенија Зографски“ се реализираше темелна реконструкција на санитарните јазли, изградба на тоалет за инвалидни лица, комплетна замена на осветлувањето и инсталација на нова интернет мрежа. Дополнително, кабинетите за одделенска настава се целосно опремени со нов мебел и ИТ опрема, а училишниот двор доби ново хортикултурно уредување со над 150 садници, поставувајќи висок стандард за современа образовна средина – соопштија од локалната самоуправа.

При тоа, наведуваат дека градежната офанзива и капиталните инвестиции подеднакво ги опфатиле и останатите образовни установи.

-Во ООУ „Кирил Пејчиновиќ“ се реши долгогодишниот проблем со задржување на водата преку поставување на павер елементи на еден од влезовите, додека внатрешноста е освежена со комплетно реновирање на училници, поставување на ново лед-осветлување и набавка на поголем број компјутери и телевизори. Слични инфраструктурни подобрувања се одвиваат и во ООУ „Кузман Шапкарев“ во Драчево, каде е поставена нова енергетски ефикасна влезна врата и хидрантска мрежа за зголемена безбедност, а во тек е и темелна реконструкција на спортската сала – информираат од Општина Карпош, нагласувајќи дека капитални вложувања тековно се одвиваат и во ООУ „Круме Кепески“, каде во централното училиште се реновирале спортската сала и соблекувалните, обновена била училишната трпезарија, поставено е ново надворешно осветлување, а потпишан бил и договор со Министерството за образование за доградба на шест нови училници. Истовремено, во подрачното училиште била пренаменета просторија која сега е целосно опремена како нова ресурсна соба.

Во меѓувреме, ООУ „Свети Климент Охридски“ добило нови бетонирани и бехатон патеки низ дворот, ново осветлување и смарт табли, додека во ООУ „Кузман Јосифовски – Питу“ во тек била изградба на нова спортска сала, реконструирана била електричната инсталација и значително бил збогатен фондот на компјутерска опрема за наставниот кадар и учениците.

-Особено значаен инфраструктурен проект се реализира во ООУ „Невена Георгиева – Дуња“, каде во тек е доградба на објектот со нови училници и санитарни јазли, а паралелно училиштето е опремено со десетици нови десктоп компјутери, лаптопи и интерактивни панели. Грижата за училишните дворови и осовременувањето на наставата е евидентна и во ООУ „Рајко Жинзифов“, каде е набавена низа неопходна опрема, од ИТ уреди и спортски реквизити за фискултурната сала, до специјализирани алати за тековно одржување на зеленилото во дворот – нагласуваат од Општина Кисела Вода.

Градоначалничката на Општина Кисела Вода, Бети Стаменкоска – Трајкоска нагласи дека обврска на Општината кон најмладите била да им обезбедат простор каде ќе можат безбедно и непречено да се развиваат, да учат и да ги остваруваат своите потенцијали.

-Реконструкциите и проектите кои ги спроведуваме во изминатиот период во основните училишта, дел самостојно, а дел со поддршка од Владата и министерствата, се одраз на нашата посветеност кон создавање модерна и функционална инфраструктура. Инвестицијата во современи образовни објекти е директна инвестиција во иднината на нашата општина и ние продолжуваме посветено да работиме во таа насока -изјави Стаменкоска Трајкоска.