Литар дизел во оваа европска земја никогаш не бил поскап: Цената достигна историско рекордно ниво

Цената на дизелот во Франција достигна историско рекордно ниво од 1985 година, надминувајќи просек од 2,18 евра за литар под влијание на геополитичките тензии на Блискиот Исток кои ги нарушуваат глобалните испораки на нафта, објавува BFM TV.

Просечната неделна цена на литар дизел минатата недела достигна апсолутен рекорд, надминувајќи ги највисоките нивоа забележани по почетокот на војната во Украина, според податоците објавени од владата.

Просечната цена на литар дизел изнесуваше 2,1888 евра, според податоците заклучени во петокот и објавени во понеделник од веб-страницата на владата за следење на цените на нафтените деривати.

Претходниот рекорд датира од 11 март 2022 година, кога цената изнесуваше 2,1407 евра за литар, а потоа од 17 јуни 2022 година, со 2,1345 евра. Податоците за цените на горивата од владата се чуваат од 1985 година.

Во вторник, дизелот, најчесто користеното гориво за патишта во Франција, се продаваше за просечна цена од 2,243 евра за литар, според пресметката на АФП врз основа на цените објавени од околу 9.600 бензински пумпи на веб-страницата на владата.

Тоа претставува зголемување од 52 центи (+30,43%) во споредба со 27 февруари, денот пред првите израелско-американски напади врз Иран.