Иранскиот претседател до Американците: Иран никогаш не го избрал патот на агресија! Ние не започнавме војна, но се браниме решително и храбро

Иранскиот претседател Масуд Пезешкијан им порача на американскиот народ дека неговата земја никогаш не била агресор, отфрлајќи ги тврдењата дека Иран претставува безбедносна закана

Во писмото упатено до граѓаните на Соединетите Американски Држави, кое го емитуваше државната телевизија Прес ТВ, Пезешкијан ја претстави својата визија за историјата и улогата на Иран во меѓународните односи, пишува Ал Џезира.

Во писмото, иранскиот претседател ја нагласува долгата историја на својата земја, истакнувајќи го нејзиниот континуитет и идентитет.

„Иран, по самото име, карактер и идентитет, е една од најстарите континуирани цивилизации во човечката историја“, напиша Пезешкијан.

Тој додаде дека во модерната историја, Иран не го избрал патот на агресија, експанзионизам или колонијализам, туку, како што тврди, исклучиво се бранел од надворешни напади.

„Иран никогаш не започнал војна, но решително и храбро се бранел од оние што го нападнале“, рече тој.

Во остатокот од писмото, Пезешкијан се осврна на перцепцијата за Иран во меѓународната јавност, тврдејќи дека е искривена и мотивирана од интересите на големите сили.

Според него, прикажувањето на Иран како закана не се базира на реални факти, туку служи за политички и економски цели.

„Таквата перцепција е производ на политичките и економските каприци на силите – потребата да се создаде непријател со цел да се оправда притисокот, да се одржи воената доминација, да се поддржи индустријата за оружје и да се контролираат стратешките пазари“, се наведува во писмото.

Порака во услови на растечки тензии

Писмото на иранскиот претседател доаѓа во време на зголемени тензии меѓу Техеран и Вашингтон, како и поширока нестабилност на Блискиот Исток.

Како што претходно објави Мехди Табатабаеи, заменик-директор за комуникации во кабинетот на иранскиот претседател, писмото на претседателот е многу важна порака до американскиот народ.

Времето не е случајно. Пораката од Техеран доаѓа непосредно пред долгоочекуваното обраќање на американскиот претседател Доналд Трамп до нацијата, за кое се очекува да даде нови информации за војната со Иран.