Комплетно реновирана градинката „Кокиче“

Успешно се завршени градежните работи на уште еден дел од објектот „Кокиче“, кој функционира во состав на градинката „Весели цветови“.

– Со овој зафат, објектот е целосно реновиран – соопштија од Општина Кисела Вода.

Оттаму информираат дека комплетно е обновен средишниот постар дел од објектот, кој опфаќа три занимални во кои престојуваат дечиња на возраст од 2 до 6 години, кујната, канцеларијата и ходникот.

– Целосно е отстранета старата ламперија од ѕидовите, поставена е арматурна мрежа, а ѕидовите се израмнети и соодветно обработени. Поставен е нов плафон. Извршени се демонтажа, темелно чистење и бојадисување на радијаторите. Поставено е ново осветлување – наведуваат од локалната самоуправа.

Притоа, додаваат дека континуираното унапредување на условите за децата во градинките останува приоритет.

– Со ова реновирање, создаваме многу попријатна, побезбедна и поздрава средина за престој и едукација на најмладите. Нашата цел е секое дете да има квалитетни услови за раст и развој, а воспитниот кадар – современ и соодветен простор за работа – потенцираат од Општина Кисела Вода.