Кој е виновен за железничката несреќа во Шпанија: Човечка грешка или системски пропуст?

Во Шпанија започна тридневна жалост по смртта на 74 лица во железничка несреќа во Толедо. Засега нема одговор зошто дошло до несреќата. Низ цела Шпанија – во Севиља, Мадрид и на железничките станици – беше одржана минута молчење за загинатите во железничката несреќа во провинцијата Толедо. Прогласена е тридневна жалост.

Локалните жители, кои беа меѓу првите што пристигнаа на местото на настанот, ја опишуваат глетката по несреќата: криците на повредените и очајничките обиди да се извлечат луѓе од остатоците на возот.

„Како што се приближував, гледав сè повеќе жртви. Кога стигнав до вагоните, глетката беше ужасна. Вагоните веќе не можеа ни да се препознаат – само хаотична купчина искривен метал и тела, со луѓе на умирање кои молеа за помош, но многу тивко, бидејќи веројатно веќе немаа сила“, вели сведокот Антонио Гарсија, фармацевт од Толедо.

„Чувство на беспомошност. Кога ќе сфатите дека веќе ништо не можете да направите – кога ќе дојде шест часот навечер и сè ќе замолкне, а вие веќе не можете да помогнете бидејќи, за жал, сега станува збор само за исчезнати и загинати – тоа е чувство на целосна беспомошност“, вели Роса.

Во Мадрид, демонстранти го изразија својот револт поради несреќата и побараа одговорност, повикувајќи на оставки од премиерот и министерот за транспорт. „Недозволиво е во Шпанија да мораме да стравуваме кога патуваме со воз. Парите треба да одат таму каде што се наменети, а не во корупција“, вели Бланка, 20-годишна студентка по право.

„Има многу загинати, а ова не е изолиран случај. Ова се случува по вторпат оваа година. За ова постојат конкретни одговорни лица – министерот за транспорт Оскар Пуенте и премиерот Педро Санчез, кој го назначи. Ова го трпиме веќе осум години – една несреќа по друга, лошо управување и немарност“, вели Давид, 22-годишен студент.

Како воопшто можело да дојде до несреќата, останува отворено прашање.

Шпанските медиуми објавија аудиоснимка од разговор меѓу машиновозачите и контролниот центар, во кој на брзиот воз на линијата Мадрид–Севиља му било дадено упатство да продолжи без ограничување на брзината по пруга на која веќе застанал друг воз поради компјутерски дефект. Министерот за транспорт, Оскар Пуенте, изјави дека техничката грешка била проследена и со човечка грешка. Синдикатите, пак, укажуваат на системски проблеми поврзани со одржувањето, обуката и протоколите.

„Можеби човечката грешка не настанала во контролниот центар, туку на самиот врв – бидејќи за овие прашања се одговорни директорот и министерот за транспорт. Капетанот на бродот треба да ја штити својата екипа, а не самиот себе“, вели Педро Повес од Синдикатот за јавни услуги.

Во меѓувреме, додека трае потрагата по одговори, продолжува и потрагата по исчезнати лица на местото на несреќата. Идентитетот на многу од жртвите сè уште не е утврден.