Општина Гази Баба во рамките на Јавниот повик за финансирање на инфраструктурни проекти од Владата на Република Македонија добива 9 милиони евра, додека Општина Бутел 6 милиони евра, со кои ќе реализира 35 проекти и со тоа ќе прераснат во големи градилишта.
Како што информираат од Општина Гази Баба, со овие средства ќе се реализираат проектите: изградба на нова детска градинка помеѓу Маџари и Ќерамидница, на нова училишна спортска сала за ООУ „Григор Прличев“ во Железара, на фекалната канализација во населено место Јурумлери, на фекална канализација за населените места Идризово и Дрма, доградба на општинско основно училиште „Крум Тошев“ во Трубарево, изградба на атмосферска канализација за улиците: „Гемиџиска“ и „Филип Филиповиќ“ во Железара, реконструкција на улицата „Петре Филиповски Гарката“ во Триангла, изградба на пристапниот пат кон гробиштата Камник, реконструкција на улиците: „Палмиро Тољати“ во Ченто, „519“ во Ќерамидница, „Жан Жорес“- од Кино Маџари до надвозникот кај ООУ „Наум Наумовски Борче“, изградба на улиците: „Париска комуна“ во Хиподром, „Ордан Поп Јорданов„ во Маџари, „22“ во Сингелиќ, „30“ во Чукур Маало, Трубарево и изградба на улица „2“ во Железара.
– За сите овие проекти е изготвена целокупната документација и за нив, по завршување на постапката во Владата, веднаш ќе почне постапка за избор на економски оператор за реализација на градежните активности – истакна Бобан Стефковски, градоначалник на Општина Гази Баба.
Со 6 милиони вера добиени од Владата Општина Бутел ќе гради нова модерна поликлиника, нов дом на културата со плоштад, нов затворен пливачки базен, нови мостови, нови спортско-рекреативни центри, нови пристапни патеки до сите влезови во населеното место Скопје-Север, во должина од 4.500 метри, реконструкција на големиот паркинг во населеното место Скопје-Север, како и уште неколку помали паркинг простори, со што значително ќе се подобри паркирањето во Скопје-Север, како и потпорен ѕид на улица 50.
(А.П.)
