Како што одржливиот туризам станува сè поважен, вреди да се обрне внимание на градовите кои вложуваат дополнителни напори за да станат поеколошки. Земете го Копенхаген како пример: од 2024 година, данската престолнина спроведува програма која ги наградува туристите за собирање отпад и за патување на одржлив начин; слични иницијативи се покренуваат и во други европски градови, пренесува „Time Out“.
За да ги препознае и награди европските градови кои предничат во заштитата на животната средина, Европската унија ја доделува наградата „Европска зелена престолнина“. Целта е да се истакнат местата кои преземаат конкретни чекори за решавање на еколошките проблеми и за подобрување на квалитетот на живот на своите жители.
Кој град е прогласен за следна „Европска зелена престолнина“? Тоа е Сарагоса, четвртиот по големина град во Шпанија, кој се наоѓа во североисточната покраина Арагон.
Одлуката беше објавена на свеченост одржана во Гимараеш, Португалија – град кој ја носи титулата „Зелена престолнина“ за 2026 година. На Сарагоса ѝ се доделени 600.000 евра за унапредување на нејзините напори за одржливост.
Наградата „Зелена престолнина“ се објавува две години однапред, што значи дека Сарагоса ќе ја носи титулата во 2028 година. Хајлброн, Германија, е избран за 2027 година, како признание за неговите напори во борбата против загадувањето на воздухот и бучавата.
Според „Еуроњуз“ (Euronews“), градовите со најмалку 100.000 жители имаат право да се натпреваруваат за наградата „Зелена престолнина“, додека помалите градови – со население помеѓу 20.000 и 100.000 жители – се натпреваруваат за титулата „Европски зелен лист“ (European Green Leaf). Оваа година, наградата „Зелен лист“ им припадна на Бенидорм и Чиклана де ла Фронтера. Бенидорм беше пофален за начинот на кој се справува со притисоците од масовниот туризам, истовремено штитејќи ја животната средина. Двата града добија по 200.000 евра. Меѓу другите кандидати за наградата „Зелена престолнина“ оваа година беа Алборг (Данска), Белско-Бјала (Полска), Кошице (Словачка) и Порто (Португалија).
Независно стручно жири ги оценуваше пријавите врз основа на критериуми како што се квалитетот на воздухот и водата, заштитата на зелените површини, управувањето со бучавата и отпадот, подготвеноста за екстремни горештини и поплави, како и мерките за намалување на емисиите.
Сарагоса победи благодарение на „доброто управување и долгорочната посветеност што му помагаат на градот успешно да се справи со растечките климатски предизвици“, се наведува на платформата за туризам на ЕУ. Градот, исто така, беше пофален за својот урбан биодиверзитет, одржливото користење на земјиштето и зелените површини, а усвои и главен план за развој на зелената инфраструктура.
