Иранскиот министер за надворешни работи, Абас Арагчи, пристигнува во Русија на разговори со претседателот Владимир Путин, додека Техеран ги засилува дипломатските напори за завршување на војната со САД.
Арагчи пристигна во Русија по посетата на Пакистан и Оман. Посетите доаѓаат во услови на интензивни дипломатски напори за смирување на регионалните тензии. Арагчи рече дека неговото патување во Русија ќе обезбеди клучна можност за преглед на развојот на војната и координирање на позициите, според новинската агенција Мехр.
Тој рече дека неговата претходна посета на Исламабад била неопходна бидејќи Пакистан бил вклучен во медијацијата, каде што, според него, разговорите постигнале одреден напредок, но не успеале да ги постигнат своите цели поради „прекумерните барања“ на Вашингтон. На пат низ Оман, министерот рече дека Иран и Оман се крајбрежни држави на Ормускиот теснец и затоа мора да ги заштитат своите заеднички интереси, додавајќи дека е важно да се продолжат дискусиите на експертско ниво за водниот пат.
Американскиот медиум, повикувајќи се на американски функционер и два извори запознаени со ситуацијата, тврди дека Иран му понудил на Вашингтон нов предлог за постигнување договор за повторно отворање на Ормускиот теснец и прекин на војната, „додека нуклеарните преговори ги одложува за подоцнежна фаза“.
Иран ја дал понудата преку пакистански посредници, објави „Аксиос“. Сепак, постигнувањето договор за Ормускиот теснец и укинувањето на блокадата на САД врз иранските пристаништа ќе го остави Трамп „без никаква вистинска моќ да го принуди Техеран да се откаже од своите залихи збогатен ураниум и да се обврзе на суспендирање на збогатувањето ураниум најмалку една деценија“, објави медиумот.
Американскиот претседател Доналд Трамп во неделата ја бранеше својата одлука да го откаже патувањето на неговите претставници во Пакистан, велејќи дека иранските власти „можат да се јават“ ако сакаат да разговараат, повторувајќи дека војната „може да заврши многу наскоро“.
