Американскиот рок музичар Брус Спрингстин ги повика официјалните лица да спречат мешање на администрацијата на Трамп во изборите

Американскиот рок-музичар Брус Спрингстин во вторникот ги повика изборните службеници и владините претставници да се спротивстават на секој обид на администрацијата на претседателот Доналд Трамп за мешање во изборите за Конгресот, предупредувајќи дека нивна должност е да обезбедат безбедно и правично броење на гласовите.

„Положивте заклетва дека ќе го чувате, штитите и браните нашиот Устав. Тоа значи дека имате свечена обврска да осигурате нашите гласови да бидат безбедно изброени“, изјави 77-годишниот музичар во видео-порака објавена на Инстаграм на денот на изборите.

Спрингстин ги повика владините претставници да не извршуваат никакви наредби што би можеле да го загрозат уставното право на граѓаните на слободни и фер избори.

„Нашиот глас е нашиот збор, а од вас зависи дали тој ќе биде слушнат“, нагласи музичарот.

Спрингстин, познат како еден од најгласните критичари на Трамп, ја поддржа демократската кандидатка Камала Харис на претседателските избори во 2024 година.

Во понеделникот, тој исто така му даде поддршка на Абдул Ел-Сајед, демократски кандидат за Сенатот во Мичиген, наведувајќи дека тој се залага за Уставот на САД и за демократијата, пренесува порталот „Дедлајн“.

„Д-р Ел-Сајед се бори за американскиот Устав, за американската демократија и против корумпираното, беззаконско и антиамериканско раководство што моментално управува со Белата куќа“, напиша Спрингстин на Инстаграм, еден ден пред изборите за Конгресот.

На овие избори, демократите имаат можност да освојат дополнителни места, додека републиканските кандидати се соочуваат со незадоволство кај гласачите поради порастот на трошоците за живот и падот на популарноста на претседателот Доналд Трамп.

Трамп, од друга страна, претходно повика на бојкот на концертите на Спрингстин, нарекувајќи го просечен и досаден пејач.

Претходно оваа година, американскиот музичар објави и протестна песна, „Streets of Minneapolis“ („Улиците на Минеаполис“), посветена на Рене Гуд и Алекс Прити, кои беа убиени од имиграциските власти за време на спроведувањето на политиката на масовни депортации на Трамп во тој град.