Траги од вирусот пронајдени во органите речиси три години по КОВИД-19

Научници од рускиот Универзитет „Сеченов“ ги поврзаа пост-КОВИД компликациите и активирањето на „заспаните“ (мирувачки) клетки на ракот со долготрајното присуство на компоненти на вирусот SARS-CoV-2 во ткивата на внатрешните органи.

Траги од вирусот беа пронајдени во кардиоваскуларните и репродуктивните органи, белите дробови и гастроинтестиналниот тракт.

Научниците ја истражуваа оваа област откако открија траги од коронавирусот во белите дробови на еден пациент, дури 35 месеци откако тој оздравел од болеста.
„Истражувачите открија РНК и протеини од коронавирусот во белите дробови, гастроинтестиналниот тракт, срцето и ендометриумот, дури и месеци или години по првичната инфекција“, се наведува во извештајот што го цитира новинската агенција ТАСС.

Научниците испитуваа примероци од ткива добиени за време на хируршки зафати и аутопсии. Користејќи ПЦР (PCR) и имунохистохемија, тие идентификуваа РНК од коронавирусот, како и неговиот „спајк“ протеин (протеин на шилците) и нуклеокапсиден протеин.

Овие наоди сугерираат дека долготрајното присуство на вирусни компоненти – заедно со автоимуните реакции – може да биде фактор што придонесува за појава на пост-КОВИД синдромот.

Вирусни компоненти беа откриени во неколку видови клетки; нарушувањето на овие клетки придонесува за хронично воспаление, оштетување на крвните садови и несоодветно снабдување на ткивата со крв.

Идентификуваните лезии во белите дробови вклучуваа хронична опструктивна белодробна болест (ХОББ), интерстицијална пневмонија и тешка фиброза. Кај една пациентка, по повторна инфекција, се разви белодробна алвеоларна протеиноза, но таа оздраве по спроведениот третман.

Научниците исто така ја истражуваа врската помеѓу КОВИД-19 и прогресијата на ракот. Кај пациенти со рак на белите дробови, вирусни компоненти беа откриени и во туморските клетки и во ендотелните клетки. Утврдено е дека аденокарциномите на белите дробови кај лицата што прележале КОВИД-19 покажуваат зголемено ниво на матични клетки на ракот – фактор што се поврзува со ризикот од метастазирање и отпорноста на туморот кон хемотерапија.

„Постои хипотеза дека коронавирусот го поттикнува преминот на матичните клетки на ракот од состојба на мирување, односно ’спиење‘, во активна состојба“, изјави патологот Елена Шчелокова, според извештајот.

Истражувачите сугерираат дека SARS-CoV-2 може да влијае врз развојот на туморот преку менување на клеточните сигнални патишта. Сепак, потребни се дополнителни истражувања за да се потврди оваа хипотеза, вклучително и споредби на состојбата на пациентите со рак, како пред, така и по заразувањето со КОВИД-19.

Траги од коронавирусот беа пронајдени и во клетките на желудникот, цревата и црниот дроб. Во ткивата на дигестивниот систем, специјалистите идентификуваа воспалителни промени и области на некроза. Меѓу забележаните состојби беа хепатална стеатоза и стеатохепатитис, гастритис, ерозии и чиреви на желудникот, хроничен лимфоцитен колитис, како и лезии на панкреасот.

Научниците истакнуваат дека е можно инфекцијата со коронавирус да придонела за прогресија на веќе постоечки гастроинтестинални заболувања. Кај пациенти со аденокарциноми на желудникот и дебелото црево, специјалистите забележаа зголемување на бројот и активноста на канцерогените матични клетки – феномен сличен на промените што се гледаат кај ракот на белите дробови.

Истражувачите, исто така, открија промени во срцевото ткиво поврзани со коронавирусот. Кај некои пациенти, по инфекцијата, се развија миокардитис и срцева слабост. Миокардитисот по КОВИД се карактеризира со оштетување на васкуларниот ендотел, што го нарушува протокот на крв кон срцевиот мускул; неговите симптоми можат да наликуваат на оние кај коронарната болест на срцето.

„Покрај тоа, миокардитисот поврзан со коронавирусот има специфични карактеристики: вирусот продира во васкуларниот ендотел, го оштетува и го спречува нормалното функционирање на крвните садови, како и снабдувањето на ткивата со хранливи материи. Следствено, клиничките манифестации на миокардитисот по КОВИД можат да имитираат коронарна болест на срцето. Затоа, темелната дијагностика е од суштинско значење за одредување на соодветна терапија“, изјави Евгенија Коган, директорка на Референтниот центар за морфолошки и имунохистохемиски истражувачки методи при Универзитетот „Сеченов“, се наведува во соопштението за јавноста.

Пациентите кои оздравеле од КОВИД-19 имаат потреба од сеопфатен преглед пред операција на срцето. Доколку воспалението опстојува, постои ризик вградениот залисток (валвула) да не може правилно да се прицврсти. Истражувачите, исто така, открија дека SARS-CoV-2 може долго време да се задржи во ендометријалното ткиво – внатрешната обвивка на матката – и да придонесе за развој на нарушувања кои водат до женска неплодност.

„Со оглед на тоа што значителен дел од оние што оздравеле од КОВИД-19 се млади луѓе, важно е да се посвети внимание на репродуктивното здравје., пренесува „Танјуг“.