Жителите на Ново Лисиче најавуваат протести за утре доколку надлежните институции во текот на денот не одговорат на нивното барање за одложување на селективното воведување зонско паркирање во Реонски Центар.
Тие информираат дека досега немаат добиено никаков одговор од Општина Аеродром и од Град Скопје и покрај доставеното барање за паралелно спроведување на зонското паркирање во Ново Лисиче и во Реонски Центар.
Жителите велат дека токму градоначалниците Дејан Митески и Орце Ѓорѓиевски во предизборниот период ветиле дека ќе се воведува зонското паркирање истовремено на двете локации за да се избегне прелевање на проблемите.
– Досегашното одложување и немањето активности на терен во Ново Лисиче не се по вина на граѓаните, туку по вина на институциите – наведуваат тие, нагласувајќи дека не бараат трајно решение, туку привремено одложување додека не се воспостави систем што ќе важи подеднакво за сите.
Во барањето, кое го доставиле до институциите, граѓаните укажуваат дека актуелниот модел создава нееднаквост меѓу жителите во иста општина. Како што наведуваат, дел од граѓаните имаат право на бесплатно паркирање во цела општина, додека други, иако живеат во непосредна близина, плаќаат за таа услуга.
