Еврото падна во однос на доларот на најниското ниво од мај 2025.

Еврото денес ослабе во однос на доларот, достигнувајќи го најниското ниво од мај 2025 година, бидејќи застојот во преговорите за повторно отворање на Ормускиот теснец и растот на цените на нафтата ја зголемија побарувачката за американскиот долар како сигурно прибежиште за инвеститорите.

Според тековните податоци од девизниот пазар, еврото се тргуваше по цена од 1,13465 долари во 10:10 часот, пренесува „Trading Economics“. Истовремено, инвеститорите ги анализираа изјавите на претседателката на Европската централна банка (ЕЦБ), Кристин Лагард, како и проекциите за инфлацијата во еврозоната.

Лагард оцени дека неодамнешниот раст на инфлацијата сè уште не довел до значителен дополнителен притисок врз цените низ еврозоната, што сугерира дека нема потреба ЕЦБ да брза со зголемување на каматните стапки. Инфлацијата во еврозоната веќе е над три проценти и, според пазарните очекувања, би можела да се доближи до четири проценти до крајот на годината.

Економистите генерално очекуваат дека ЕЦБ ќе ги задржи каматните стапки непроменети на состанокот на 29 октомври, а потоа ќе пристапи кон заострување на монетарната политика во декември, откако ќе бидат објавени новите економски проекции.