Епидемиолог: „Хантавирусот не е новиот Ковид 19“

Епидемиологот Славица Марис изјави дека не постои реална опасност од ширење на андскиот сој на хантавирус кај општата популација по појавата на инфекција со овој вирус на крузерот „Хондијус“.

Таа додаде дека опасноста не постои бидејќи бара поблизок и подолг контакт со заразено лице, а сите луѓе што биле на бродот се ставени под медицински надзор.

„За разлика од Северна и Јужна Америка, каде што се јавува овој сој на вирусот, во Србија спорадично се појавува сој што популарно се нарекува глувчешка треска, но кој немал епидемиски размери во последните години“, изјави за „Политика“ Марис, раководител на Одделот за контрола и превенција на заразни болести во Градскиот институт за јавно здравје во Белград.

Таа предупреди дека е важно да се избегнува престој на места каде што е познато дека можете да дојдете во контакт со глодари слични на глувци, чии екскрети го пренесуваат вирусот.

Таа објасни дека хантавирусот не се пренесува толку лесно како грипот или Ковид-19 и додаде: „Нема можност за појава на голема епидемија во Србија, ниту пак сме регистрирале таква откако ја работам оваа работа“.

„Кога станува збор за можноста некој што е заразен да го донесе вирусот во земјата, треба да се знае дека секое лице што престојува во ендемските подрачја каде што се јавуваат болести како што се хеморагична треска, маларија или денга е ставено под задолжителен здравствен надзор“, рече Марис.