„Затишје пред бура“: Tрамп објави нова ВИ фотографија со предупредувачка содржина/ФОТО

Американскиот претседател Доналд Трамп повторно беше исклучително активен на својот профил на социјалната мрежа Truth Social преку ноќ, а покрај тоа што објави видео од пред шест години во кое наводно наредува напад со разурнувач врз ирански авион, тој сподели и фотографија генерирана од вештачка интелигенција, која предупредува на „затишје пред бура“. Фотографијата, генерирана од вештачка интелигенција, го прикажува Доналд Трамп опкружен со воени бродови со ирански знамиња, на бурно море над кое се наоѓаат црни облаци од кои блескаат молњи.

„Њујорк тајмс“ вчера објави дека САД и Израел прават најинтензивни подготовки за обновени напади врз Иран откако беше договорено примирје минатиот месец. Двајца блискоисточни функционери изјавија дека двете земји се обидуваат да бидат подготвени уште следната недела.

Пентагон подготви планови за евентуално продолжување на воените операции против Иран, вклучувајќи поинтензивни воздушни напади и потенцијално распоредување на американски специјални сили, објави вчера „Њујорк тајмс“.

Според весникот, американскиот претседател Доналд Трамп сè уште не донел конечна одлука за следните чекори по враќањето од Кина, каде што разговараше со кинескиот претседател Си Џинпинг.

Весникот наведува дека Пентагон ја разгледува можноста за продолжување на операцијата „Епски бес“, која претходно беше суспендирана по прогласувањето на примирјето.

Министерот за одбрана на САД, Пит Хегсет, му рече на Конгресот дека САД имаат подготвени планови за ескалација на конфликтот доколку е потребно, како и опции за повлекување на силите од регионот.

Според „Њујорк тајмс“, една од опциите што се разгледуваат вклучува дополнително бомбардирање на иранските воени и инфраструктурни цели, додека друга предвидува испраќање специјални сили за преземање контрола врз нуклеарниот материјал во објектот во Исфахан.