Полицијата му поднесе кривична пријава на насилникот од Охрид кој крвнички ја претепа и влечеше во автомобилот својата 26 годишна девојка, која во моментов се наоѓа во болницата Св.Еразмо во Охрид на лекување. Кристијан. К е пуштен со мерки на претпазливост кои ги донесе Основниот суд во Охрид, меѓу кои и забрана за приближување до девојката и нејзиниот дом.
„СВР Охрид поднесе кривична пријава против К.К.(31) од Охрид поради постоење основи на сомнение за сторено кривично дело „тешка телесна повреда“ по член 131 став 3 од Кривичниот законик. На 15.11.2026 околу 02:00 часот, по претходна расправија која започнала во неговиот дом, а продолжила во неговиот автомобил, пријавениот во возилото физички ја нападнал неговата 26-годишна девојка од охридско. Откако го сопрел возилото, продолжил со нападот, при што девојката изгубила свест и паднала, по што била пренесена во Општата болница во Охрид, а потоа и во болницата „Св. Еразмо“ во Охрид, каде ѝ биле констатирани тешки телесни повреди. Преземени се мерки и набргу по настанот, во 05:05 часот К.К е лишен од слобода и задржан во полициска станица. Додека, по барање на ОЈО, Основен суд во Охрид донесе решение и му изрече мерки на претпазливост“, стои во соопштението на МВР
Пријава е најавена и за таткото на девојката кој по сознанието дека неговата ќерка е претепана од партнерот упатил, закани до член на неговото семејство, инаку во јавноста познато по именувани функции.
„Во врска со настанот, на 15.11.2026 во 08:50 часот во СВР Охрид, Љ.К.(51) од Охрид, мајка на К.К., пријави дека Љ.Ѓ.(49), татко на девојката, на мобилен телефон упатил закани на нејзиниот син К.К. и на целото семејство, по што истиот ден во 13:20 часот во Охрид и тој е лишен од слобода и задржан во полициска станица. Против него, исто така, ќе биде поднесен соодветен поднесок“, информираат од МВР. (П.А.)












