Добри вести за Мерц!

Германскиот канцелар Фридрих Мерц може да здивне откако неговите конзервативци од ЦДУ (CDU) го освоија најголемиот број гласови на локалните избори во сојузната покраина Долна Саксонија, додека крајно десничарската Алтернатива за Германија (AfD) исто така оствари значителен напредок.

ЦДУ на изборите одржани во текот на викендот освои 27,2 проценти од гласовите, додека социјалдемократите, коалицискиот партнер на ЦДУ, добија 24,6 проценти. AfD го зазеде третото место со 15,9 проценти од гласовите, што е за 11,3 процентни поени повеќе отколку на изборите во 2021 година.

Резултатите претставуваат извесно олеснување за Мерц, една недела откако неговата партија беше uбедливо поразена од AfD на покраинските избори во источна Германија, што ја потресе владата и го доведе во прашање неговото политичко идно и програмата за реформи.

ЦДУ ги освои изборите за градоначалник на Волфсбург, градот во кој се наоѓа седиштето на Volkswagen, еден од најголемите производители на автомобили во светот и најголем приватен работодавач во покраината. Копретседателката на AfD, Алис Вајдел, ги наведуваше проблемите во Volkswagen, кој планира да укине десетици илјади работни места, како пример за пропустите на владата.

Меѓутоа, во индустрискиот град Залцгитер, каде што се наоѓа седиштето на истоимената компанија, ЦДУ не освои доволно гласови, што значи дека ќе се одржи втор круг од изборите за градоначалник во кој ќе се соочи со AfD.

Мерц овој викенд го очекува многу посериозен тест на уште два покраински избори, на кои се очекува AfD повторно да го освои најголемиот број гласови во источната покраина Мекленбург-Западна Померанија.

И во главниот град Берлин ќе се одржат покраински избори, на кои крајно левичарската партија Die Linke би можела да освои најголем број гласови.