Ја изведоа најголемата кражба во историјата – Како дејствуваат хакерите на Ким Џонг Ун?

Две водечки фирми кои вршат анализа на технологијата и трансакциите поврзани со криптовалутите, пронашле цврсти докази што ја поврзуваат рекордната кражба од берзата за криптовалути „Binance“ со севернокорејски хакери. Според нивната анализа, зад нападот во кој се украдени средства во вредност од 6,3 милијарди долари, најверојатно стои „Lazarus Group“ – хакерска група зад која стои севернокорејскиот режим.

Компаниите „TRM Labs“ и „Chainalysis“, кои се занимаваат со безбедност, ја идентификуваа групата позната како „TraderTraitor“ како главен осомничен за нападот врз најголемата светска берза за криптовалути, пренесува BBC.

Станува збор за кражба која, според својот обем, далеку го надминува претходниот рекорд. Во нападот врз берзата „Bybit“ во 2025 година беа украдени 1,5 милијарди долари, што тогаш се сметаше за најголема кражба во историјата на криптовалутите.

Сајбер-криминалот како извор на приход за режимот

Овој последен напад е дел од низата сајбер-операции што ѝ се припишуваат на Северна Кореја – една од најсиромашните земји во светот, чии граѓани имаат многу ограничен пристап до интернетот. Експертите со години предупредуваат дека режимот на Ким Џонг Ун се потпира на сајбер-криминалот за да собере средства за финансирање на државата, но Пјонгјанг редовно ги отфрла таквите обвинувања.

Според достапните извештаи, Северна Кореја систематски ги развива своите хакерски капацитети. Талентирани студенти од елитни факултети се регрутираат и насочуваат кон специјализирани групи кои работат под надзор на разузнавачките служби. Анализите на технолошките компании укажуваат на тоа дека дел од овие операции се спроведуваат од соседна Кина.

Иако финансиските измами станаа примарна цел на овие операции, најозлогласениот напад што ѝ се припишува на „Lazarus Group“ не беше насочен кон пари. Во 2014 година, цел беше филмското студио „Sony Pictures“, кое ја продуцираше комедијата „Интервјуто“ (The Interview) – филм чие дејство се врти околу заговор за атентат врз севернокорејскиот лидер Ким Џонг Ун.

Хакерите украдоа и објавија илјадници интерни електронски пораки на високите раководители на студиото, што предизвика големо меѓународно внимание.

Минатата година, американското ФБИ објави дека Северна Кореја стои и зад кражбата на 1,5 милијарди долари од берзата за криптовалути „Bybit“. Според американската агенција, група позната како „TraderTraitor“ веднаш по нападот започнала со перење на украдените средства. Средствата биле претворени во биткоин и други дигитални валути за да се прикрие нивната трага, а потоа биле разменети за готовина.

ФБИ ја обвини Северна Кореја за спроведување „незаконски сајбер активности и кражба на виртуелни средства“. Севернокорејските хакери се исто така осомничени за кражба на криптовалути во вредност од 620 милиони долари во текот на 2022 година.

Како беше изведена кражбата од „Binance“?

Во овој најнов инцидент, истражителите се сомневаат дека напаѓачите искористиле одредени овластувања за да ги променат оперативните параметри на „жежок паричник“ (hot wallet) на „Binance“. „Жежок паричник“ претставува дигитален паричник поврзан со интернет, во овој случај, тој наводно бил реконфигуриран автоматски да ги пренасочува средствата кон сметка под контрола на напаѓачите. Од „TRM Labs“ сметаат дека напаѓачот веројатно успеал да пристапи до системот на „Binance“ за потпишување трансакции уште за време на подготовката на операцијата.

„Binance“ не одговори директно на прашањата на BBC во врска со можната поврзаност на нападот со Северна Кореја. Компанијата првично соопшти дека се сомнева оти компромитиран компјутер на еден од инженерите овозможил неовластено повлекување на средствата. Сепак, подоцна признаа дека нападот бил од многу поширок обем.

„Нашата понатамошна истрага откри дополнителни точки на влез“, изјави Ричард Тенг, еден од извршните директори на „Binance“. Портпарол на компанијата во петокот изјави дека околу 80 отсто од украдените средства се обезбедени, додека судбината на остатокот сè уште е непозната.

Доколку се потврдат сомнежите, оваа рекордна кражба ќе покаже колку напреднале способностите на севернокорејските хакерски групи, но и колку станале софистицирани нивните методи.

Експертите предупредуваат дека развојот на вештачката интелигенција, која може да ја олесни автоматизацијата на нападите и откривањето слабости во компјутерските системи, отвора нови можности за криминалците. Во овој случај, постои голема веројатност дека вештачката интелигенција била користена и при пробивањето на инфраструктурата на „Binance“.

Од „Chainalysis“ истакнаа дека напаѓачот користел шеми за перење пари „какви што досега немаме видено“.