Купувањето од „Тему“ „Шеин“ и „АлиЕкспрес“ од денеска уште поскапо! 

Од 1 ноември, Европската унија воведува такса за обработка во износ од два евра за увезените пратки, која ќе се применува без оглед на вредноста на пратката.

Оваа нова мерка има за цел да ги покрие трошоците за царински контроли и да одговори на наглиот пораст на увозот на евтини стоки, првенствено преку кинески онлајн платформи како што се Temu, Shein и AliExpress.

Оваа такса се додава на царинскиот надомест од три евра, воведен во јули за мали пратки со вредност помала од 150 евра. Овој надомест е привремен и се очекува да остане на сила до 2028 година, кога треба да биде воспоставен нов информациски систем на ЕУ за царински постапки.

За разлика од царинскиот надомест, кој се однесува конкретно на мали пратки, новата такса од два евра ќе важи за сите пратки што влегуваат на пазарот на ЕУ, без оглед на нивната вредност. Нејзината цел е да ги покрие трошоците поврзани со обработката и следењето на овие пратки.

„Целта на царинскиот надомест е да се обезбедат еднакви услови за сите: за сета стока што влегува во ЕУ треба да се плати соодветен и оправдан износ на царина. Целта на таксата, пак, е да се покријат трошоците за контроли, бидејќи електронската трговија создава непропорционален товар за нашите царински органи“, изјави претставник на ЕУ.