Џијанг Сјаојан: Здравјето не е само индивидуално прашање – што може да ѝ донесе кинеската здравствена стратегија на Северна Македонија?

Среќниот живот за народот е најголемото човеково право, а здравјето е темелот на таа среќа. Кинеската Влада отсекогаш го става здравјето на луѓето на истакнато место и вложува долгорочни напори и инвестиции за таа цел. Кога беше основана Народна Република Кина во 1949 година, просечниот животен век изнесуваше само околу 35 години. Денес, Кина го изгради најголемиот здравствен систем во светот, со повеќе од 1,1 милион медицински и здравствени институции и со повеќе од 13 милиони здравствени работници. Основното здравствено осигурување опфаќа 1,4 милијарди луѓе, со стапка на учество над 95 %, а повеќе од 90 % од жителите може да стигнат до најблиската здравствена установа во рок од 15 минути. До 2025 година, просечниот животен век во Кина се зголеми на 79 години, а медицинските институции обезбедија повеќе од 10 милијарди прегледи и третмани таа година.

Во 2026 година, кинеските „Две сесии“ повторно ја нагласија потребата од зајакнување на примарните здравствени услуги, континуирано подобрувајќи ги координираниот развој и управувањето со медицинските услуги, здравственото осигурување и фармацевтскиот сектор, со што се унапредува иницијативата „Здрава Кина“ и се придонесува за понатамошно зголемување на владините субвенции за здравственото осигурување на жителите, со цел луѓето да може да уживаат поправедни и подостапни здравствени услуги.

Кина веќе го формулираше својот 15. Петгодишен план за национален економски и социјален развој, кој продолжува да му дава приоритет на развојот насочен кон луѓето, и понатаму го унапредува здравствениот сектор. Во исто време, Кина обезбедува основни јавни здравствени услуги што го опфаќаат целиот животен циклус и за урбаното и за руралното население. Без оглед на нивото на приход или местото на живеење, луѓето може да пристапат до основни здравствени услуги. Националната здравствена комисија на Кина проценува дека, преку континуирани напори, се очекува да се зголеми просечниот животен век на околу 80 години до 2030 година.

За да ја постигне оваа цел, Кина го интегрираше јавното здравје во својот севкупен економски и социјален развоен план и го воведе планот „Здрава Кина 2030“. Предлозите за 15. Петгодишен план, исто така, предвидуваат посистематски и понаучни решенија за развојот на здравствениот сектор. Прво, Кина промовира здрав начин на живот, охрабрувајќи ги луѓето да посветуваат поголемо внимание на сопственото здравје преку балансираната исхрана, редовното вежбање и правилниот режим на живот, додека ефикасно ги контролираат телесната тежина, крвниот притисок, липидите и шеќерот во крвта за да постигнат поквалитетен живот. Второ, Кина гради сеопфатен систем што ги интегрира „превенцијата, лекувањето, рехабилитацијата и управувањето“: зајакнување на системите за контрола на болестите во превенцијата, подобрување на итниот одговор и мултидисциплинарната соработка во лекувањето и унапредувањето на рехабилитациските услуги, особено за постарите лица со инвалидитет. Трето, Кина продолжува да ја промовира рамномерната распределба на висококвалитетните медицински ресурси преку мобилните медицински услуги, теренските програми и телемедицината, овозможувајќи им на луѓето да добиваат здравствена грижа блиску до своите домови и решавајќи ја нееднаквоста во распределбата на ресурсите.

Студија објавена во списанието „The Lancet“ предвидува дека просечниот животен век во Кина би можел да достигне 81,3 години до 2035 година. Поздрава Кина не само што ќе им користи на сопствените граѓани туку и ќе создаде нови можности за соработка со земјите во светот.

Прво, тоа може да ја унапреди размената во управувањето со здравството. Кина се залага за градење „глобална заедница на здравје за сите“ и активно учествува во глобалното здравствено управување. Животниот век во Северна Македонија е сличен со оној во Кина, а двете земји се соочуваат со предизвици како што е стареењето на населението. Двете страни може да ги зајакнат размената и меѓусебното учење во развојот на здравствениот систем, превенцијата и контролата на хроничните болести и услугите за грижа за стари лица, заеднички истражувајќи решенија за јавноздравствените предизвици што произлегуваат од демографските промени.

Второ, тоа може да обезбеди повеќе јавноздравствени производи. Кинеската фармацевтска индустрија го забрзува иновирањето нови лекови и медицински уреди. На пример, Кина ја изведе првата далечинска роботска субретинална инјекциска операција во светот, извршена на растојание од 4.200 километри, со користење на 5Г- технологија. Кина, исто така, користи роботски системи во уролошката хирургија за да постигне поголема прецизност, помалку компликации и побрзо закрепнување. Доктор Виктор Станков од Северна Македонија неодамна се обучувал во Првата придружна болница на Медицинскиот универзитет во Гуангџоу и е посветен на промовирањето на овие напредни технологии во Северна Македонија, што се очекува подобро да им користи на нејзините граѓани. Во меѓувреме, услугите „Интернет + здравство“ во Кина брзо се развиваат, овозможувајќи им на пациентите да пристапуваат до онлајн консултации, електронски рецепти и плаќање на здравственото осигурување преку мобилни апликации. Овие иновации отвораат нови можности за здравствена соработка меѓу Кина и Северна Македонија.

Трето, тоа може да создаде повеќе пазарни можности. „Здрава Кина“ не се однесува само на подобрувањето на здравствениот систем туку и на водењето национална трансформација кон поздрав начин на живот заснован на хранлива исхрана. На четвртиот Експо на Кина и на земјите од Централна и од Источна Европа, нискокалоричната храна од Северна Македонија беше добро прифатена од кинеските потрошувачи. Како што продолжува да напредува стратегијата „Здрава Кина“ така побарувачката за производи поврзани со здравјето на кинескиот потрошувачки пазар ќе продолжи да расте, создавајќи поголеми можности за повеќе македонски производи да влезат на кинескиот пазар.

Кина активно ги застапува и практикува четирите глобални иницијативи за развој, безбедност, цивилизација и управување, постојано придонесувајќи со кинеските мудрост и сила за создавање глобална заедница на здравје за сите. Кина цврсто ги поддржува мултилатерализмот и водечката и координирачка улога на Светската здравствена организација во глобалното здравствено управување. Кина е подготвена да учествува во процесот на реформи на СЗО за подобрување на нејзината ефикасност во задоволувањето на здравствените потреби на земјите членки, да ги поддржи ефективните медицински и здравствени активности на СЗО и да обезбеди финансиски и интелектуални ресурси за СЗО во рамките на своите можности. Од 1963 година, Централната влада на Кина испратила 31.000 медицински лица во 77 земји и региони, вклучувајќи ги и повеќето најмалку развиени земји и обезбедувајќи медицинска помош за повеќе од 300 милиони пациенти.

Тајван е неотуѓив дел од Кина. Под предуслов за почитување на принципот „Една Кина“, Централната влада на Кина им придава големо значење на здравјето и на благосостојбата на нашите сонародници во Тајван и направи соодветни аранжмани за учеството на регионот Тајван во глобалните здравствени прашања. Експертите од регионот Тајван можат да учествуваат на релевантните технички состаноци на СЗО, додека Тајван има контакт-точка за меѓународните здравствени регулативи, која е способна навремено да добива и пријавува информации за јавноздравствените вонредни состојби.

Здрава Кина

Кина ја забрзува трансформацијата на здравството и на биомедицината водена од вештачката интелигенција

Основна филозофија на традиционалната кинеска медицина: вашиот внатрешен универзум