До 18 часот денеска во Македонија се регистрирани вкупно 27 пожари на отворен простор, од кои 11 се активни, три се под контрола, а 13 се изгаснати, информираат од Центарот за управување со кризи (ЦУК).
Активни се пожарите во:
– Општина Студеничани: Моране – Вртекица – Рамни Габер, каде гори мешана шума.
– Општина Зелениково: Добрино и Тисовица, каде е зафатена шума со даб и габер.
– Општина Сарај: село Бојане, мешана шума.
– Општина Македонски Брод: местото Видуш, кај Драгов Дол и кај Локвица, каде гори ниска вегетација, нискостеблеста шума и грмушки.
– Општини Јегуновце и Сарај: пожарот кај Копанце и Туденце се проширува кон Бојане.
– Општина Прилеп: село Чаниште, со два крака – едниот кон Зовиќ, а другиот кон Крушевица.
– Општина Старо Нагоричане: село Сув Орах, каде станува збор за шумски пожар, а зафатена е и куќа.
– Општина Гостивар: село Ѓоновица, нискостеблеста вегетација.
– Општина Јегуновце: Копанце и Туденце, ниска вегетација.
– Општина Тетово: село Фалиште, ниска вегетација.
– Општина Арачиново: село Орланци, депонија.
Под контрола се пожарите во Делчево, на депонија, во Дебреште, Општина Долнени, исто така на депонија, како и во Мусници, Општина Могила, каде гори ниска вегетација.
Во текот на денот се изгаснати пожари и во повеќе општини, меѓу кои Брвеница, Кратово, Ранковце, Велес, Студеничани, Зелениково, Штип, Долнени, Ѓорче Петров, Сарај и Аеродром.
ЦУК продолжува да ја следи состојбата на терен, особено во подрачјата каде пожарите сè уште се активни.
