Во администрацијата на американскиот претседател Donald Trump расте сомнежот дека Иран нема целосно да ги исполни обврските што се очекуваат во рамките на новиот нуклеарен договор.
Според американски медиуми, директорот на Central Intelligence Agency, Џон Ратклиф, на затворени состаноци го предупредил Трамп дека разузнавачките информации сугерираат оти Техеран можеби нема да се согласи на клучните нуклеарни отстапки што ги бара Вашингтон.
Наводно, Ратклиф не е единствениот функционер кој изразил резерви. Државниот секретар Марко Рубио и секретарот за одбрана Пет Хегсет исто така покренале прашања околу содржината на меморандумот за разбирање.
Од друга страна, потпретседателот Џ. Д. Венс, специјалниот претставник Стив Виткоф и советникот Џарен Кушнер го поддржале договорот и продолжувањето на дипломатските напори.
Според изворите, американските разузнавачки служби пресретнале информации кои покажуваат дека иранските претставници приватно зборувале поинаку отколку што им претставувале на американските преговарачи и меѓународните посредници.
- Разузнавачките информации покажуваат дека намерите на Иран не се целосно усогласени со обврските што се очекуваат според договорот, изјавил извор запознаен со разговорите.
Од Белата куќа нагласуваат дека конечната одлука ќе ја донесе лично Трамп и дека нема да биде прифатен договор кој не ги исполнува американските безбедносни барања.
Меморандумот потпишан во неделата претставува само прва фаза од процесот, а во следните 60 дена треба да се договорат деталите за конечниот нуклеарен договор.
Во меѓувреме, се очекува нова рунда разговори меѓу американските и иранските претставници, со посредство на Катар и Пакистан.
Иако официјалниот текст на договорот сè уште не е објавен, дел од американските извори сметаат дека Иран во моментов добива повеќе отстапки отколку што нуди, освен ако во наредната фаза не прифати мерки што целосно ќе ги задоволат барањата на САД во врска со неговата нуклеарна програма.
