Бурни овации за Ѓорѓи Цуцковски во Сицилија, македонскиот тенор ја освои публиката во два настапа на фестивалот „Дуе Сичилае“

Со изведби на популарни арии од „Тоска“ и „Турандот“ на Џакомо Пучини и „Вертер“ на Жил Масне, Цуцковски ѝ ја презентираше на италијанската публика својата вокална и уметничка интерпретација на дел од најпознатиот оперски репертоар, при што на двата настапа беше повикан на бис. Првата вечер Цуцковски настапи во аудиториумот „Анџело Муско“ во Гравина ди Катанија, а следната вечер во црквата „Сант’Андреа“ во Мило, во областа Катанија

Бурни овации го означија настапот на македонскиот тенор Ѓорѓи Цуцковски, кој се претстави на две концертни вечери на меѓународниот музички фестивал „Дуе Сичилае“ во Сицилија, Италија. Со изведби на популарни арии од „Тоска“ и „Турандот“ на Џакомо Пучини и „Вертер“ на Жил Масне, тој ѝ ја презентираше на италијанската публика својата вокална и уметничка интерпретација на дел од најпознатиот оперски репертоар, при што на двата настапа беше повикан на бис.

Настапите на македонскиот тенор Цуцковски се одржаа на 2 и 3 октомври, во завршниот викенд на второто фестивалско издание. Првата вечер, Цуцковски настапи во аудиториумот „Анџело Муско“ во Гравина ди Катанија, а следната вечер во црквата „Сант’Андреа“ во Мило, во областа Катанија. Двата настапи беа проследени со бурни овации, а публиката го врати Цуцковски на бис на двете концертни вечери.

За Цуцковски, ваквиот прием има особено значење поради можноста да ја претстави Македонија пред публика со длабока оперска традиција.

„Среќен сум и задоволен од овие настапи. Приемот кај публиката ми даде чувство на признание и потврда за мојата работа пред европска публика со високи критериуми и длабоко познавање на операта. Секогаш е големо задоволство да ја претставуваш својата држава како уметник надвор од нејзините граници, особено кога настапуваш на престижни сцени и пред публика за која операта е дел од културниот идентитет, речиси како фолклорот. Кога за изведбата ќе бидеш награден со бурни овации, тоа е потврда дека македонските уметници се рамноправни со светските и дека навистина имаме со што да се гордееме“, изјави Цуцковски.

На двете вечери, македонскиот тенор настапи со оркестарот „Винченцо Сконтрино“, под диригентство на маестро Давиде Галаверна. Како солист во продукцијата учествуваше и саксофонистот Џанфранко Брундо. Концертниот концепт ги поврза оперскиот глас, оркестарскиот звук и изразните можности на саксофонот, внесувајќи различни музички бои во програмата.

Изборот на арии од Пучини и Масне отвори простор за претставување на лирската чувствителност и драмскиот израз на Цуцковски. Овој репертоар бара вокална сигурност, внимателно обликување на музичката фраза и силна интерпретација, преку која емоцијата на оперските ликови допира до слушателите и во концертна изведба.

Неговото гостување беше истакнато уште во фестивалските најави. Организаторите го претставија како еден од истакнатите солисти во Европа, нагласувајќи ги моќта и топлината на неговиот тенорски глас. Учество на македонскиот уметник беше најавено и во италијанските медиуми.

Второто издание на „Дуе Сичилае“ се одржа од 29 август до 4 октомври, во организација на „Ареа суд“, под уметничко раководство на Кети Теријака и Џанфранко Брундо. Програмата опфати настапи во Гравина ди Катанија, Катанија и Мило, поврзувајќи класична и камерна музика, џез, традиционални звуци и современи жанровски спојувања.

Со успешно гостување во Сицилија, Цуцковски ја продолжува својата меѓународна уметничка дејност и придонесува за видливоста на македонската оперска уметност надвор од државата. Приемот за кој сведочи уметникот е и лична радост и поттик за нови средби со европската оперска публика.