Бакингемската палата ги разјасни дилемите: Каков статус ќе имаат Хари и Меган ако се вратат во Британија?

Кралот Чарлс III го изнесе својот став за враќањето на принцот Хари и Меган Маркл во Велика Британија, јасно ставајќи до знаење дека нивниот евентуален живот во земјата нема да значи и враќање на кралските должности.

Како што пренесува „Дејли мејл“, кралот преку својот висок официјален претставник, Лордот Чемберлен, испратил писмо до повисоките заинтересирани страни во Владата, армијата и меѓу лордовите намесници, во кое се наведени насоки за статусот на војводата и војвотката од Сасекс.

Во писмото се наведува дека Хари и Меган не се активни членови на кралското семејство и дека тоа и понатаму останува така, како и дека нивните титули „Неговото и Нејзиното Кралско Височество“ остануваат надвор од употреба.

Кралските официјални лица нагласија дека сè е во согласност со желбата на двојката, доколку престојуваат во Велика Британија, да имаат статус на приватни лица, како и со таканаречениот „Сандрингемски договор“, кој сè уште е на сила.

– По одлуката на војводата и војвотката од Сасекс да се преселат во Велика Британија, примивме бројни барања за насоки. За да се избегне секојдневна сомнеж или забуна, кралот наложи да се споделат следниве информации – се наведува во писмото.

Инаку, Хари и Меган во јануари 2020 година се повлекоа од вршењето на официјалните должности во име на монархот и дека од тогаш не се работни членови на кралското семејство.

Нивниот статус, според документот, останува непроменет.

– Нивните титули како Неговото и Нејзиното Кралско Височество остануваат во мирување и не се користат – се наведува во насоките.

Исто така е прецизирано дека хуманитарната работа на двојката е нивна приватна работа и дека ја вршат во лично својство. Нивната позиција е опишана како слична на позицијата на „обични граѓани со комерцијални и добротворни интереси“.

Посебно е нагласено дека сите прашања од државните и официјалните институции во врска со евентуалните церемонијални гестови кон Хари и Меган, особено кога станува збор за користење на јавни средства, треба да се упатуваат до Бакингемската палата.

Кога станува збор за нивната безбедност, кралот јасно стави до знаење дека тие прашања нема да се решаваат преку кралското домаќинство.

– Сите прашања за оперативната безбедност треба и понатаму да се упатуваат до надлежните полициски органи – се наведува во писмото.

Сите административни прашања и преписката во врска со Хари и Меган би требало да бидат упатени директно до нивната канцеларија, која, како што е наведено, ќе продолжи да функционира одвоено од Кралското домаќинство.

Писмото, според наводите на медиумите, е споделено и со самите војвода и војвотка од Сасекс.

Пораката од Бакингемската палата е прилично јасна – Хари и Меган можат да живеат во Велика Британија, но нивното враќање не значи и враќање во кралските редови.