Шумахер што јавноста не го познаваше: Нетфликс ја открива приказната за сезоната што му го промени животот

Стримионг платформата Нетфликс го објави првиот трејлер за новиот документарец „Шумахер ’94 – Раѓањето на една легенда“, кој се занимава со една од најдраматичните сезони во кариерата на Михаел Шумахер.
Филмот се враќа во 1994 година, кога тогашниот 25-годишен германски возач ја освои првата од своите седум титули во Светското првенство во Формула 1.

Заедно со снимките од трките и малку познатите детали од неговиот приватен живот, важен дел од документарецот се и сеќавањата на неговата сопруга Корина, која зборува за Михаел, кого јавноста немаше можност често да го гледа.

Документарецот ќе биде достапен на Нетфликс од 2 октомври, а веќе првите кадри покажуваат дека нема да се занимава само со успесите на Михаел Шумахер на патеката, туку и со драматичните настани што ја одбележаа таа сезона, пишува „Index.hr.“

Годината што сè промени

Шумахер влезе во сезоната 1994 како голем талент, но малкумина можеа да предвидат дека неговото издигнување до статусот на еден од најуспешните возачи во историјата на Формула 1 ќе започне таа година. Тој ја отвори сезоната со победа во Бразил, и наскоро стана јасно дека е сериозен кандидат за титулата.

Сепак, 1994 година не беше запаметена само по трките.

Тоа беше една од најмрачните сезони во историјата на Формула 1. За време на викендот на Гран При на Сан Марино во Имола, се случија две трагедии: австрискиот возач Роланд Раценбергер почина за време на квалификациите, а само еден ден подоцна, Аиртон Сена, еден од најголемите возачи на сите времиња, го загуби животот во трката.

Новиот документарец на Нетфликс не се потпира само на архивски снимки од трките. За првата шампионска сезона на Шумахер зборуваат луѓето што биле со него тогаш. Меѓу соговорниците се Флавио Бријаторе, тогашен шеф на Бенетон, поранешниот шеф на Формула 1, Берни Еклстоун и долгогодишниот менаџер на Шумахер, Вили Вебер.