Дискотеките, кабареата и ноќните барови ќе добијат посебен државен регистар на лиценци, а сопствениците на апартмани и приватно сместување ќе плаќаат трошоци за категоризација. Надоместоците во дел од постапките се удвојуваат, а речиси сите административни процедури во угостителството ќе се поднесуваат и ќе се издаваат онлајн. Ова се дел од најзначајните измени што Владата ги предлага со измените на Законот за угостителска дејност, кој веќе е во собраниска процедура.
Со предложените решенија се воведуваат електронски барања, лиценци и жалби, нови регистри за угостителските објекти, построги правила за категоризација на приватното сместување и нови казни за службени лица и членови на комисии кои нема да постапуваат во законските рокови. Една од најзначајните новини е формирањето регистар на издадени лиценци за ноќни барови, кабареа и дискоклубови, кој ќе го води Министерството за економија и труд.
Постапката за добивање лиценца треба да стане побрза, при што надлежниот министер ќе треба да донесе решение во рок од 30 дена, а лиценцата ќе се издава истиот ден.
Промени се предвидуваат и за приватното сместување. Категоризацијата на куќи за одмор, апартмани, станови и соби за издавање ќе ја вршат тричлени комисии формирани од градоначалниците. Решението ќе важи три години, а општините ќе водат регистар на категоризирани објекти и ќе доставуваат извештаи до Министерството.
Предлог-законот носи и значајна дигитализација на секторот. Угостителите, туристичките агенции и физичките лица ќе можат електронски да поднесуваат барања, да бараат лиценци и да комуницираат со институциите преку Националниот портал за електронски услуги. Решенијата, лиценците и другите документи ќе се издаваат и по електронски пат, а институциите ќе бидат обврзани потребните податоци да ги обезбедуваат по службена должност.
Со измените се удвојуваат и одредени надоместоци за туристичките агенции и дел од угостителските субјекти, а се воведуваат и нови санкции за службени лица и членови на комисии што нема да постапуваат во законските рокови.
Според Владата, реформата треба да придонесе за намалување на административните бариери, побрзи услуги и поефикасна јавна администрација, а воедно е дел од обврските поврзани со користење средства од европскиот Инструмент за реформи и раст за Западен Балкан.
