Два автомобила се запалени кај Амбасадата на Република Бугарија во Скопје. Од скопската Противпожарна бригада велат дека по брзата интервенција огнот е изгаснат. „Дојавата е добиена во 12.10 часот дека опожарени се две патнички возила. Интевенираа тројца пожарникари со едно противпожарно возило, пожарот е целосно изгаснат за половина час и нема штета на околните објекти“ вели за весникот Вечер, Звонко Томевски, командант на скопската Противпожарна бригада.
Запалени се автомобили од марките „киа“ и „сузуки“ со дипломатски регистарски таблички. Полицијата и по интервенцијата на пожарната го обезбедува теренот, се собираат траги од терен со цел да се испитаат причините за пожарот, а се разговара со вработените во амбасадата. Од полицијата засега не откриваат детали, само дека се трага по сторителот.
