За новиот Клинички центар во Скопје Владата преговара со сопственикот на земјиштето кај базенот „Борис Трајковски“

Премиерот Христијан Мицкоски најави дека идниот Клинички центар во Скопје, кој според него треба да биде „ултра модерен“, ќе има капацитет да привлекува пациенти не само од земјава туку и од соседните држави. Како локација се разгледува просторот кај базенот „Борис Трајковски“ во Општина Карпош, а во моментов Владата прави преговори со сопственикот на парцелата.

„Преговараме дали може да се најде замена, државата да ја добие таа парцела, потоа со специјален закон да ѝ се смени намената“, изјави Мицкоски

Според премиерот, избраната локација за новиот Клинички центар има добра сообраќајна поврзаност, пристап до гасоводна мрежа и близина до обиколницата, што ја прави погодна за развој на современ здравствен комплекс. Тој најави и изградба на подземен премин под булеварот „Илинденска“, со кој новиот центар би се поврзал со Градската општа болница „8 Септември“ и поликлиниката „Букурешт“.

„Нашата амбиција е таму да се создаде модерен здравствен комплекс. Болницата „8 Септември“ располага со современа опрема, а со поврзувањето на институциите ќе се создадат подобри услови за пациентите и медицинскиот кадар“, изјави Мицкоски.

Премиерот очекува изградбата на новиот Клинички центар да започне во текот на следната година. Инаку, уште во ноември минатата година Мицкоски оцени дека просторот околу ГОБ „8 Септември“ е најсоодветна локација за изградба на нов Клинички центар, посочувајќи ги добрата инфраструктура и можностите за натамошно проширување на здравствениот комплекс.