Вардар на „огнено крштавање“ кај Мелсунген

По четири години пауза, најтрофејниот македонски ракометен клуб, Вардар, пак ќе биде дел од европскиот ракометен крем. „Црвено-црните“ добија вајлд-карта од Европската ракометна федерација за настап во Лигата на шампионите во сезоната 2026/27.

Вардар двапати ја освои Лигата на шампионите, во 2017 и 2019 година, а ЕХФ во својата најава посебно го истакна клубот и неговите најголеми успеси на меѓународната сцена.

Последниот настап на Вардар во Лигата на шампионите беше во сезоната 2021/22. По четиригодишно отсуство, „црвено-црните“ повторно ќе имаат можност да се надигруваат со најдобрите европски клубови и да го вратат Скопје на големата ракометна мапа.

Вардар, вечерва, од 20.45 часот, ќе ја отвори новата сезона во Лигата на шампионите со едно од најтешките можни гостувања, против германскиот Мелсунген. Тренерот Иван Чупиќ е свесен за квалитетот на противникот, но нагласи дека овој натпревар ќе биде поинаков од дуелите што двата тима ги одиграа минатата сезона и очекува неговите избраници да покажат дека заслужено се дел од европската елита.

„Ова е друго натпреварување и друг дел од сезоната. Кога игравме против нив минатата сезона, тие веќе имаа доволно бодови, а во тој период имаа и многу повредени ракометари. Сега се комплетни, а станува збор и за отворање на Лигата на шампионите. Затоа очекувам сосема поинаков натпревар. Ние во моментов сме во малку незгодна ситуација. Не се сите ракометари здрави и имаме одредени проблеми. Тешко дека на почетокот ќе можеме да настапиме со поширок состав. Го имаме тоа што го имаме, а потоа ќе видиме како ќе се развиваат работите. Тешко е да се зборува пред почетокот и пред првиот натпревар. Вардар е млада екипа, условно кажано. Во сегашниот состав нема многу ракометари со искуство од настапи во Лигата на шампионите. Можеби само двајца или тројца имаат такво искуство, но не треба премногу да зборуваме за тоа. Имаме уште три-четири дена за да го подготвиме натпреварот. Се надевам дека добро ќе се подготвиме и дека ќе отпатуваме подготвени да се докажуваме. Мелсунген ја има фаворитската улога, но играчите ќе треба да го покажат тоа на теренот. Ние, пак, треба да покажеме дека сме подготвени за Лигата на шампионите и за еден сериозен натпревар“, изјави Чупиќ.

Во новата сезона Лигата на шампионите ќе брои 24 екипи, кои ќе бидат поделени во шест групи со по четири тима. Ова значи дека Вардар повторно ќе има можност да игра натпревари од највисоко европско ниво пред своите навивачи.