Речиси сите деца во светот се изложени на барем една климатска опасност, а стотици милиони се соочуваат со повеќекратни ризици како што се суши, екстремна топлина и поплави, соопшти УНИЦЕФ во нов извештај.
Според УНИЦЕФ, околу 1,8 милијарди деца се изложени на суши, додека 1,2 милијарди се погодени од екстремна топлина, објави „Ројтерс“.
Организацијата предупредува дека децата се „несразмерно погодени“ од сè поинтензивните климатски промени и ги повикува владите итно да инвестираат во инфраструктура и системи за управување со катастрофи.
Во извештајот се вели дека околу 1,1 милијарда деца се изложени на најмалку три преклопувачки климатски ризици, вклучувајќи поплави, топлотни бранови и бури.
Извештајот, исто така, предупредува на „повеќекратни опасности“ што можат да ги оптоварат јавните системи и социјалните услуги.
Дополнителни ризици вклучуваат болести како што е маларијата, која погодува околу милијарда деца, главно во Африка.
Во 2024 година, 242 милиони деца во 85 земји имале прекинато образование поради климатски опасности.
УНИЦЕФ ги идентификуваше Сомалија, Мадагаскар, Мјанмар, Камбоџа и Пакистан како најранливи земји, додека економиите зависни од земјоделството во Африка и Азија се особено изложени на ризик.
Во извештајот, исто така, се наведува дека децата во земјите без излез на море страдаат од непропорционални ризици од суша, опустинување и поплави, предупредувајќи дека недостигот на вода дополнително ќе се интензивира во наредниот период, пренесува „Танјуг“.
