„Унгарска вечер“ со концерт на Салаи и Балог на „Охридско лето“

Во црквата „Света Софија“, вечерва (18 август) од 21 часот во рамките на „Охридско лето“ ќе се одржи „Унгарска вечер“ со концерт на Ноеми Салаи, на кларинет и Александра Балог, на пијано. На програмата се: Р. Шуман со Фантастична пиеса оп. 73 и Три романси оп. 94, Мате Бела со Инсомниа, Кодај со Марошек танци, Р. Кокаи со Четири унгарски танци и Б. Барток со Романски танци.

Младата унгарска кларинетистка Ноеми Салаи како оркестарски музичар настапува со престижниот Унгарски фестивалски оркестар под диригентство на Иван Фишер во Единбург, во Будимпешта и во Њујорк. Соработува со камерниот оркестар „Орфеус“, со Симфонискиот оркестар на Бингхамптон, со ансамблите на „Џулијард“, со Симфонискиот оркестар на Принстон, како и со ансамблот за современа музика „Аксиом“. Свири и во Светскиот оркестар кој го носи името на Золтан Кодај под диригентската палка на Тамаш Васари. Носителка е на признанија и награди од натпреварите во Унгарија, Италија, Словенија, Босна и Херцеговина, Канада и САД.

Александра Балог, пак, се вбројува во некои од највозбудливите пијанисти на нејзината генерација. Како солист настапувала со повеќе оркестри во Унгарија и во Велика Британија, а настапувала и на сцените на „Карнеги Хол“ во Њујорк, во салата на Конзерваториумот „П. И. Чајковски“, во Центарот за уметности во Месксико Сити и во Капелата за музика во Брисел. Концертните настапи ја водат низ повеќе земји во Европа, во САД, во Мексико и во Еквадор, како и во поголемите културни центри низ Азија.