Убиена лекарката на британското кралско семејство

Докторката Хана Кејн, која лекувала членови на британското кралско семејство, е пронајдена мртва во нејзиниот дом во Дерсингем, во близина на кралскиот имот Сандрингем. Нејзиниот сопруг е уапсен под сомнение за убиство. Кралот Чарлс и кралицата Камила се известени за нејзината смрт.

Полицијата во Норфолк била повикана во домот на Хана Кејн – професионално позната како Хана Тери – кратко по 2 часот наутро на 4 октомври. Повикот бил упатен од службите за итна помош, а смртта на докторката била констатирана на самото место.

Нејзиниот сопруг, Марк Кејн, бил уапсен под сомнение за убиство и останува во притвор додека трае истрагата. Полицијата подоцна добила налог за продолжување на неговиот притвор за дополнителни 32 часа, со цел да им се овозможи на истражителите повеќе време за испрашување. Следниот ден била извршена обдукција.

Во моментот на трагедијата, во куќата биле и трите деца што ги имала со Марк Кејн. Децата спиеле, а по инцидентот, грижата за нив ја презеле надлежните служби. Хана Кејн работела во Медицинскиот центар „Гримстон“, кој по нејзината смрт објави дека привремено ги затвора своите врати.

Во пораката објавена на веб-страницата на центарот се наведува: „Со жалење ги известуваме пациентите дека Медицинскиот центар ’Гримстон‘ е привремено затворен поради исклучително тешките околности што влијаат врз нашиот тим. Се извинуваме за прекинот во работата и ви благодариме за трпението и разбирањето во овие многу тешки моменти за нашите колеги.“

Центарот подоцна соопшти дека нема да дава никакви изјави во врска со докторката и дека сите официјални информации ќе доаѓаат од полицијата. Кејн, исто така, ја водела својата приватна ординација наречена „Норфолк Скај Естетикс“ (Norfolk Sky Aesthetics).

Семејството на починатата докторка преку полицијата упати изјава во која наведува дека се „скршени од болка поради загубата на нивната прекрасна Хана“.