Конфликтот меѓу Анџелина Џоли и Бред Пит, кој трае со години по нивниот развод, повторно се најде во центарот на вниманието на светската јавност.
Адвокатот на Анџелина Џоли изнесе сериозни обвинувања на сметка на Бред Пит, тврдејќи дека познатиот актер продолжува да ја вознемирува својата поранешна сопруга и неуморно се обидува да ја задржи контролата врз неа. Според правниот тим на актерката, таа со години се обидувала целосно да го прекине контактот и да продолжи понатаму со својот живот, но тоа и понатаму ѝ е оневозможено поради неговото однесување.
Нивниот однос веќе со години го следат меѓусебни обвинувања, маратонски правни битки и жестоки спорови кои се водеа како за старателството над нивните шест деца, така и за заедничкиот имот. Посебно комплициран беше повеќегодишниот спор околу францускиот имот и винарската вила „Шато Миравал“, каде што двајцата беа сосопственици за време на бракот — случај кој дополнително ги разгоре нивните судири.
Џоли и Пит беа еден од најпознатите холивудски парови. Заедно минаа повеќе од една деценија, се венчаа во 2014 година, а Џоли поднесе барање за развод уште во 2016 година. Иако нивниот развод беше правно финализиран дури кон крајот на 2024 година, нивната војна во судницата сѐ уште го нема добиено својот конечен епилог.
