Шведскиот државјанин Али Намдар, клучна фигура во мрежата „Фокстрот“, е уапсен во Мароко поради тешки кривични дела, вклучително и регрутирање малолетници. Овој 21-годишен Швеѓанец, кој е еден од најбараните криминалци во Европа, е уапсен во Мароко. Истражителите го сметаат Али Намдар за клучна фигура во мрежата „Фокстрот“, а меѓу другото, се сомничи дека регрутирал малолетници за вршење тешки насилни дела.
За него беше издадена меѓународна потерница од Интерпол и се наоѓаше на листата на Европол за најбарани бегалци во Европа.
Шведските истражители го сметаат Намдар за стратешки важна фигура во озлогласената мрежа „Фокстрот“. Се сомничи дека од Мароко координирал тешки дела во Шведска, пишува „Блувин“ (Bluewin).
Листата на обвиненија е долга. Намдар се соочува со вкупно 18 кривични дела, вклучувајќи обид за убиство и бомбашки напади. Во Шведска против него се издадени неколку налози за апсење.
Еден случај од ноември минатата година е особено сериозен. Намдар се товари дека наговорил 12-годишно девојче и 17-годишно момче да постават активни рачни бомби во шведскиот град Борос. Неговиот адвокат ги отфрла овие обвиненија.
Според пишувањата на медиумите, Намдар наводно регрутирал 12-годишно девојче да постави две активни рачни бомби. Шведска сега се подготвува за негово екстрадирање.
Што е мрежата „Фокстрот“?
„Фокстрот“ е криминална мрежа составена од дилери на дрога, трговци со оружје и платени убијци. Од 2022 година, британските медиуми ја поврзуваат оваа група со околу 35 убиства во Европа.
Шведските власти ја обвинуваат оваа мрежа дека таргетирано регрутира малолетници. Меѓу другото, се наведува дека ги користат за извршување пукања, поставување експлозивни направи или како курири.
Се верува дека мрежата има контакти и надвор од Шведска, вклучително и во Норвешка, Данска и Обединетото Кралство. „Фокстрот“ исто така се сомничи дека планирал или поддржувал напади врз противници на иранскиот режим, како и врз израелски и еврејски институции.
