Шведско разузнавање: Иранска мрежа стои зад нападот на американската амбасада во Осло

Тројца браќа на возраст од дваесет години, норвешки државјани од ирачко потекло, кои во неделата навечер ја нападнаа американската амбасада во Осло со импровизирана бомба, дејствувале по иницијатива на шведската криминална мрежа Фокстрот, се сомнева шведската безбедносна служба „Сакерхетсполисен“.

Како што објави шведскиот јавен радиодифузен сервис СВТ, „Сакерхетсполисен“ верува дека Фокстрот веќе некое време ги финансира сторителите на атентати врз критичари на иранскиот режим и терористички напади врз американските и израелските интереси во Европа. Нападот врз амбасадата во Осло е само најновата таква акција и постои можност да има уште.

Извор од Секерхетсполисен за СВТ изјави дека Фокстрот е под притисок од иранскиот режим да биде поактивен во Европа. Имено, Рава Маџид, 40-годишен шведски државјанин од иранско-курдско потекло и водач на оваа криминална мрежа, која првенствено се занимава со трговија со дрога, е осомничен дека со години живеел во Иран и таму уживал заштита од режимот.

Сега се очекува Маџид да ја врати услугата и да организира напади врз цели одредени од Техеран. Маџид во последниве години стана симбол на тоа што се случува кога класичниот организиран криминал се спојува со меѓународни врски, политички интереси и брутално насилство.

Тој е познат во шведската јавност по прекарот „Курдската лисица“, а шведската полиција го опишува Фокстрот како хиерархиски систем што Маџид го контролира од странство.

Во март 2025 година, Министерството за финансии на САД воведе санкции врз Фокстрот и самиот Маџид, тврдејќи дека соработуваат со иранските разузнавачки служби. Во оправдувањето на САД, исто така, се наведува дека Фокстрот учествувал во нападот врз израелската амбасада во Стокхолм во јануари 2024 година. Поради војната на Блискиот Исток, Маџид стана безбедносна закана што оди далеку од Скандинавија.

Норвешката полиција уапси тројца мажи, браќа од ирачко потекло, на возраст од околу 20 години, под сомнение за терористички бомбашки напад по експлозијата пред американската амбасада во Осло во текот на ноќта, соопштија денес локалните власти.

Полицискиот обвинител Кристијан Хатло изјави дека тројцата осомничени, браќа кои живеат во Осло, се уапсени и сите се обвинети за кривично дело терористички бомбашки напад, објави норвешкиот јавен радиодифузен сервис НРК. Хатло рече дека полицијата верува дека еден од уапсените мажи е претходно барано лице осомничено за поставување на експлозивната направа, додека другите двајца наводно учествувале во нападот на различни начини.

„Се работи за норвешки државјани од ирачко потекло“, рече Хатло.

Полицијата вели дека е важно да се утврди мотивот за нападот, можните соучесници и можните нарачатели во понатамошните истраги.

Хатло рече дека истражителите разгледуваат неколку хипотези, вклучувајќи ја и можноста нападот да бил нарачан од државен актер.

Тој рече дека оваа можност се разгледува поради фактот дека целта била амбасада на САД и моменталната безбедносна и политичка ситуација во светот.