Трамп воведува нови царини, кои стапуваат на сила утрово, погодени се 60 земји

Десетици трговски партнери на САД, од Европа до Кина и Индија, сега се соочуваат со нови царини од 10 до 12,5 проценти за стоки извезени во Соединетите Држави, соопшти Канцеларијата на трговскиот претставник на САД, пренесува Си-Ен-Ен.

Времето на воведување на новите царини се совпаѓа со истекот на речиси универзалната царина од 10 проценти што претседателот Доналд Трамп ја воведе претходно оваа година, која Врховниот суд ја прогласи за неуставна.

„Претседателот нема да дозволи неговата трговска политика и пошироките цели да бидат поткопани само затоа што еден инструмент може да биде ограничен со судска наредба или некој друг фактор“, изјавија високи претставници на Белата куќа за новинарите во четвртокот за време на брифингот на кој ги најавија мерките.

Најновата одлука доаѓа по неколкумесечна истрага на американскиот трговски претставник за наводна принудна работа во производството на стоки извезени во САД, како и неуспехот на некои земји да ги спречат ваквите практики.

Европската унија ги доведе во прашање новите царини, а шефицата за надворешна политика на ЕУ, Каја Калас, ги нарече „негативно изненадување“ и ги отфрли обвинувањата за принудна работа како неосновани. Швајцарија, исто така, ги отфрли обвинувањата, додека Норвешка изјави дека нема планови да возврати со царини за американски стоки.

Новите царини се однесуваат на увоз од земји кои ги снабдуваат САД со речиси сите стоки што ги купуваат од странство. Претставници на администрацијата изјавија дека тие ослободуваат различни производи, вклучувајќи нафта и гас, како и стоки што не можат да се произведуваат во САД.

За повеќето Американци, оваа промена веројатно нема веднаш да доведе до зголемување на цените, бидејќи во голема мера е продолжение на царините што увозниците веќе ги плаќаа.