Меланија постигна подобри резултати од Виткоф и Кушнер – разговарала со Путин и Зеленски

Првата дама на Соединетите Држави, Меланија, денес потврди дека, посредувајќи за прекин на огнот во градот Олешки, разговарала и со рускиот претседател Владимир Путин и со украинскиот претседател Володимир Зеленски.

„Разговаравме и потпишавме договор“, изјави Меланија Трамп во Палм Бич, по гласањето во раниот рок за среднорочните избори, пренесува „Њујорк пост“.

На прашањето дали ќе отпатува во Украина, таа одговори дека ќе види, додека нејзиниот сопруг, американскиот претседател Доналд Трамп, навести дека такво патување би можело да се случи. Тој додаде дека неговата сопруга постигнува подобри резултати од неговите професионални пратеници, Стив Виткоф и Џаред Кушнер.

„Таа е поуспешна од нашите професионалци. Таа обезбеди прекин на огнот. Тука станува збор за деца и луѓе – за постари лица“, рече Трамп.

Градот Олешки, кој се наоѓа во регионот Херсон, е сместен на околу осум километри зад линијата на фронтот.

Во петокот, Меланија Трамп објави дека посредувала за локален прекин на огнот во градот, со цел да се овозможи евакуација на населението и достава на хуманитарна помош.

Демократите ја обвинија Меланија Трамп дека си припишува заслуги што му припаѓаат на папата; сепак, и Русија и Украина ја потврдија нејзината улога во посредувањето за договорот, пренесува Танјуг.