Филмовите од Венеција и пред домашната публика

Директорот на Венецискиот филмски фестивал, Алберто Барбера, ја претстави програмата на 83. издание на најстариот филмски фестивал во светот, кој ќе се одржи од 2 до 12 септември. Годинашната селекција повторно ги обединува најзначајните авторски имиња на современата кинематографија, меѓу кои Кејси Афлек, Вернер Херцог, Хироказу Корееда, Ли Чанг-донг, Нани Морети, Стефан Бризе и многу други.

Македонската дистрибутерска куќа МЦФ МКД соопшти дека и оваа година ги обезбедила правата за дел од највпечатливите наслови од официјалната програма на фестивалот кои, по своите светски премиери во Венеција, ќе пристигнат и пред домашната публика.

Од главната натпреварувачка програма, МЦФ Македонија ги донесува филмовите „A Good Soldier“ на Стефан Бризе, „A Place to Heal“ на Седрик Кан, „Look Back“ на јапонскиот мајстор Хироказу Корееда, „Succederà Questa Notte“ на Нани Морети, „The Echo Chamber“ на Андреа Палаоро, „One Minute to Midnight“ на Никола Паризер, „The Spiral“ на Паоло Стриполи и „The Color of the Sun“ на Ксавиер Тера.

Од програмата „Venice Open – Out of Competition“ во дистрибуција на МЦФ Македонија пристигнува документарниот филм „Imperium“ на еден од најзначајните современи документаристи, Сергеј Лозница.

Во селекцијата „Venice Spotlight“, македонската публика ќе има можност да ги погледне и „Hombre al Agua“, новиот режисерски проект на Гаел Гарсија Бернал, како и „Ground Floor“ на унгарскиот режисер Габор Реис.

– Со овие единаесет филмови, МЦФ МКД продолжува да ја збогатува домашната кино-понуда со најактуелните и најзначајни авторски остварувања од најголемите светски филмски фестивали. Дел од филмовите веќе важат за потенцијални кандидати за најпрестижните светски филмски награди, а по нивните фестивалски премиери ќе бидат прикажани и во македонските кина, додаваат оттаму.