Светското првенство пристигнува во Мексико, но околу стадионот се откриваат вреќи со човечки останки

Мексико се подготвува за Светското првенство, но безбедносната ситуација во земјата станува сè потежок товар за властите и организаторите. По смртта на водачот на картелот Халиско, насилството се прошири во неколку држави, што покренува прашања за тоа дали државата може да ги заштити стадионите, националните тимови и туристите пред доаѓањето на милиони навивачи. Откако мексиканската армија го уби Немесио Осегера Сервантес, познат како Ел Менчо, озлогласениот водач на картелот Халиско, кон крајот на февруари, во неколку мексикански држави избувнаа немири. Картелот одговори со блокади на патиштата, пукање и грабежи.

Ситуацијата оттогаш се смири. Мексиканската претседателка Клаудија Шајнбаум постојано нагласуваше дека властите работат на обезбедување на безбедноста на граѓаните, како и на сите оние кои ќе дојдат во Мексико за Светското првенство за еден месец.

Околу 120.000 луѓе се водат како исчезнати

И покрај то што по елиминацијата на Ел Менчо и апсењето на друг водач на картелот пред две недели, насилството што го спроведуваат продолжува да го обележува мексиканскиот живот во многу делови од земјата. Во овој момент, околу 120.000 луѓе се водат како исчезнати.

Експертот за безбедност Дејвид Сауседо изјави за ARD дека се сомнева во способноста на Мексико да ги заштити тимовите, туристите и навивачите.

„Доколку владите на САД и Мексико продолжат да вршат притисок врз картелот од новата генерација Халиско, тоа ќе го наруши Светското првенство и ќе предизвика настани што ќе ја принудат мексиканската влада да престане да го напаѓа тој картел“, вели Сауседо.

Околу стадионот Акрон во Гвадалахара, каде што ќе се играат четири натпревари од Светското првенство, според ARD, во последните месеци се откриени стотици вреќи за ѓубре со човечки остатоци, а 16.000 луѓе исчезнаа само во сојузната држава Халиско.

Иако натпреварите од Светското првенство нема да се играат во Гереро, една од 31-те мексикански федерални држави, АП вчера објави сторија што ја прикажува состојбата и животот на луѓето во таа држава. Имено, како што пишува АП, помеѓу 800 и 1.000 семејства биле принудени да ги напуштат своите домови во планините на централно Мексико откако криминална група ги нападнала со рачно изработени експлозиви лансирани од дронови.

Бројот на туристи е далеку од планираниот

Нападите ги започна група позната како Лос Ардиљос, а локалните заедници и религиозните организации велат дека бандитите со години се обидуваат да земат земја од домородните заедници во битка за територија со голем број сопернички криминални групи.

Покрај Гвадалахара, натпреварите ќе се играат во Мексико Сити, каде што првиот натпревар од првенството ќе го играат домаќините и Јужна Африка на познатиот стадион Ацтека, чија изградба во 1960-тите ја надгледуваше сега 86-годишниот архитект Луис Мартинез дел Кампо.

По двегодишна реконструкција, стадионот сè уште ги исполнува стандардите на ФИФА и наскоро ќе стане единствениот каде што Светското првенство се отворило три пати. Пеле ги крена трофеите таму во 1970 година, а Марадона во 1986 година, а Мартинез дел Кампо е загрижен дека неговата земја би можела да биде избегнувана од туристите за време на Светското првенство од безбедносни причини.

Ситуацијата не е ветувачка, што го потврдува и побарувачката за хотели и летови, кои, како и во Соединетите Американски Држави, се под минатогодишните нивоа, иако од различни причини. Мексиканската влада очекува 5,5 милиони туристи за време на Светското првенство, но досега евидентираните резервации се сè уште далеку од таа бројка.