КАЗНИ ДО 1.200 ЕВРА! Нови камери на автопатот во Словенија

Возачите на словенечките автопати можат да очекуваат нов пристап кон контролата на брзината. На четири делници е поставен систем од камери за „мерење на брзината на делница“, а наместо да се бележи брзината на возилото во една точка, системот ја пресметува просечната брзина на одредено растојание.

Тоа значи дека забавувањето непосредно пред камерата за контрола на брзината – по што следува повторно забрзување – повеќе нема да биде доволно за да се избегне казна, доколку возачот ја надмине дозволената просечна брзина, пренесува Putni Kofer.

Како функционира новиот систем?

Камерите на почетокот на надгледуваната делница го регистрираат времето на влегување на возилото, додека вториот сет камери на крајот го регистрира времето на излегување. Врз основа на должината на делницата и времето потребно за нејзино поминување, системот ја пресметува просечната брзина.

На пример, ако возач помине десет километри за четири минути, неговата просечна брзина изнесува 150 километри на час. Ако ограничувањето на брзината на таа делница е 130 километри на час, тоа претставува прекршок – без оглед на тоа со која конкретна брзина возилото поминало покрај поединечните камери.

Целта на овој систем е да ги поттикне возачите да одржуваат порамномерна брзина и да ја подобри безбедноста во сообраќајот.

Според податоците од Словенечкиот институт за метрологија, системот за мерење на брзината на делница е поставен на четири локации: на автопатот А1, на делницата Логатец – Врхника (во правец кон Љубљана); на автопатот А2, помеѓу Љубљана Брод и Водице (во правец кон Крањ); исто така на А2, помеѓу Гросупље и Иванчна Горица во правец кон Ново Место; како и на автопатот А1, помеѓу Подмиље и Лочица во правец кон Марибор, во близина на тунелот Тројане.

Казни до 1.200 евра

Казните за пречекорување на брзината на словенечките автопати се движат од 40 до 1.200 евра, во зависност од степенот на пречекорување. За пречекорување на брзината до 10 километри на час предвидена е парична казна од 40 евра, додека за пречекорување од 10 до 30 километри на час се плаќаат 80 евра. Ако возачот ја надмине дозволената брзина за 30 до 40 километри на час, казната изнесува 160 евра.

За пречекорување од 40 до 50 километри на час, казната е 250 евра, додека за поголеми пречекорувања се предвидени построги санкции. За возење со брзина што е за повеќе од 60 километри на час поголема од дозволената, казната може да достигне до 1.200 евра.

Покрај паричните казни, за сериозни сообраќајни прекршоци може да се изречат и казнени поени.