Срцето ќе ви биде благодарно: Седум утрински навики со кои ќе го држите крвниот притисок под контрола

Првите неколку минути по будењето можат да бидат идеално време да направите нешто корисно за вашето срце и крвниот притисок.

Иако утринските навики не можат да ја заменат медицински препишаната терапија, тие можат да придонесат за подобра контрола на крвниот притисок и за општо чувство на виталност.

Крвниот притисок природно се покачува наутро додека телото се подготвува за дневните активности.

Кај луѓето со хипертензија, овој пораст може да биде поизразен, поради што експертите препорачуваат денот да се започне смирено и со воведување неколку здрави рутини.

1. Испијте чаша вода веднаш штом ќе станете
Телото губи течности во текот на ноќта преку дишењето и потењето, па затоа е важно тие да се надоместат веднаш по будењето.

Чашата вода му помага на телото полесно да се разбуди, ја поттикнува циркулацијата и придонесува за нормално функционирање на крвните садови.

2. Не посегнувајте веднаш по телефонот
Многу луѓе почнуваат да ги проверуваат пораките, социјалните мрежи и вестите штом ќе ги отворат очите. Започнувањето на денот на овој начин може да го зголеми нивото на стрес и да ги активира телесните системи на пребрзо темпо.

Обидете се да им ги посветите првите десет до петнаесет минути на себе и да го започнете утрото без користење екрани.

3. Излезете на утринска светлина
Ако имате можност, поминете неколку минути на балконот, во дворот или на кратка прошетка.

Природната светлина помага во регулирањето на внатрешниот биолошки часовник, ја зголемува будноста и може да го подобри вашето расположение.

4. Раздвижете го телото со лесни вежби
Не ви е потребен интензивен тренинг веднаш по станувањето.

Неколку минути истегнување, лесна јога или кратка прошетка се доволни за да се поттикне циркулацијата и телото да се подготви за дневните обврски.

Редовната физичка активност е еден од најважните сојузници во справувањето со хипертензијата.

5. Одвојте време за длабоко дишење
Бавните и контролирани вежби за дишење можат да му помогнат на телото да се опушти и подобро да се справи со утринскиот наплив на хормони на стрес.

Само неколку минути вакво дишење можат да помогнат во забавувањето на пулсот и да поттикнат чувство на смиреност.

6. Изберете појадок што е добар за срцето
Погрижете се првиот оброк во денот да биде богат со влакна, витамини и минерали.

Овесот, овошјето, јогуртот и јаткастите плодови се одличен избор, додека внесот на сол и преработена храна треба да се сведе на минимум, бидејќи вишокот натриум може да придонесе за покачен крвен притисок.

7. Не брзајте со кафето
Кофеинот делува различно кај секого, но кај некои луѓе може да предизвика привремено покачување на крвниот притисок.

Ако имате хипертензија, внимавајте како реагира вашето тело и избегнувајте да ја пиете првата шолја кафе на празен стомак.

Малите промени во утринската рутина нема преку ноќ да го решат проблемот со високиот крвен притисок, но можат да бидат важен дел од здравиот начин на живот.

Во комбинација со редовна терапија, соодветна исхрана, физичка активност и медицински совети, овие навики можат да помогнат во подобро справување со хипертензијата и во зачувувањето на здравјето на срцето.