Со повеќе од 28 милиони денари, Старата чаршија добива нов лик

Старата скопска чаршија полека, но сигурно почнува да добива ново руво. Деновиве стартуваа градежните работи за еден од најголемите проекти за нејзино обновување, а увид на терен направи градоначалникот на Општина Чаир, Изет Меџити.

Во првата фаза од проектот се работи на поставување нова водоводна и канализациска мрежа. Потоа ќе следува обновување на препознатливата калдрма, поставување ново осветлување во староградски стил и средување на јавните површини, со цел Чаршијата да стане поуредена и пофункционална, без да го изгуби својот автентичен изглед.

– Со инвестиција од преку 28 милиони денари, на Старата чаршија ѝ ги враќаме функционалноста, современиот стандард и достоинството што ги заслужува. Ја обновуваме инфраструктурата, а во исто време го чуваме нејзиниот историски дух и препознатлив лик – порача Меџити.

Од Општина Чаир велат дека целта е да се подобрат условите за граѓаните, дуќанџиите и туристите, а Старата скопска чаршија да остане едно од најважните места во градот, препознатливо по својата историја, култура и традиција.