Системот за квалитет на АХВ оценет како високоефикасен

Агенција за храна и ветеринарство (АХВ) успешно го заврши редовниот надзорен аудит спроведен од сертификациското тело MQS, при што беа констатирани позитивни наоди и високи оценки за воспоставениот, имплементиран и одржуван систем за управување со квалитет во институцијата.

Аудитот беше реализиран согласно со барањата на меѓународниот стандард ISO 9001:2015 и опфати сеопфатна анализа на организациската посветеност кон исполнување на стандардот, управувачките процеси, оперативните процедури, како и кон степенот на нивна практична примена во секојдневното работење. Посебен акцент беше ставен на ефикасноста на интерните контролни механизми, управувањето со ризици и континуираното подобрување на институционалните перформанси.

Во својот извештај, аудиторскиот тим констатира дека Агенцијата демонстрира висок степен на институционална подготвеност, јасно дефинирани надлежности и одговорности, како и систематизиран пристап кон планирање, следење и оценување на работните процеси. Беше истакнато дека воспоставениот систем за управување со квалитет не претставува формална обврска, туку функционален механизам кој реално придонесува за зголемување на ефикасноста, транспарентноста и отчетноста во работењето.

Позитивно беа оценети доследната примена и редовното ажурирање на процедурите и интерните акти, системот за интерни проверки и корективни мерки, континуираната едукација и професионален развој на вработените, јасно дефинираните цели за квалитет и индикатори, како и ориентираноста кон корисниците и следењето на нивното задоволство.

Успешно реализираниот аудит претставува значајна потврда дека Агенцијата функционира во согласност со стандардот ISO 9001:2015, обезбедувајќи сигурен и стабилен систем за заштита на јавното здравје, безбедноста на храната и на здравјето и благосостојбата на животните.

– Овој резултат е плод на континуирана посветеност, професионалност и тимска работа на вработените во Агенцијата, како и на стратешката определба на раководството за градење модерна, транспарентна и ефикасна институција, усогласена со европските принципи и добри практики – истакна директорот на АХВ.

Агенцијата останува цврсто определена и во иднина да го надградува системот за управување со квалитет преку унапредување на процесите, дигитализација на услугите и зајакнување на институционалните капацитети, со крајна цел – обезбедување највисоко ниво на заштита на здравјето на граѓаните преку безбедноста на храната.