Синер почнува бојкот, се чека реакцијата на Ѓоковиќ

Се создаваат нови турбуленции во светот на тенисот. Некои од најдобрите светски тенисери, жени и мажи, најавија бојкот на Ролан Гарос, но како што напредуваше натпреварувањето, се сведе на ограничувања на прес-конференциите и на повици за зголемување на наградниот фонд. Бидејќи со ова не се постигна ништо од она што го предвиде Новак Ѓоковиќ, тенисерите подготвуваат нов, радикален потег.

Како што објавува „Тајмс“, најдобриот тенисер во светот, Јаник Синер, е прв во заговарањето нов бојкот и се очекува да го пропушти турнирот во мешани двојки на Отвореното првенство на САД, заедно со неколку други тениски ѕвезди. Тоа ќе биде начин да им се даде до знаење на организаторите на последниот грен-слем во сезоната дека е време за промена.

Вимблдон спречи такво сценарио, бидејќи беше најавено зголемување на наградниот фонд за 20 %, а дали ќе го следат Американците овој тренд или ќе се соочат со големи компликации, останува да покаже времето.

Од минатата сезона, мешаните двојки се играат една недела порано пред сингл, што требаше да придонесе за популарноста на тенисот во двојки. Одѕивот на познати имиња беше одличен, но оваа година тој турнир е во опасност. Гледавме двојки како Ѓоковиќ-Даниловиќ, Алкарас-Радукана, Дрејпер-Пегула во Њујорк, а сега љубителите на тенисот би можеле да бидат лишени од спектаклот.

Ѓоковиќ не го поддржа бојкотот на Ролан Гарос

Српскиот ас редовно одржуваше медиумски конференции на вториот грен-слем во сезоната и не покажа солидарност со Арина Сабаленка и со другите играчи што го скратија своето време пред медиумите. Причината не беше тоа што не ги поддржува, туку тоа што не верува дека овој вид бојкот може да им донесе некакво подобрување. На крајот, се покажа дека беше во право.

– Не сум дел од тоа. Навистина не можам да коментирам. Можам да се залагам за правата на играчите како и досега, не само за најдобрите играчи туку и за оние од понизок ранг. Јас не донесувам одлуки, не учествувам, само работам како и досега. Треба да учиме од голферите и да бидеме обединети. Сега е време за тоа – рече тогаш Ѓоковиќ.