Маск потроши милиони на републиканците, а потоа се пошегува: „Моите вселенски ласери за мешање во изборите овој пат не делуваа“

Технолошкиот милијардер Илон Маск во средата се пошегува на сметка на поразот на Републиканците на среднорочните избори во САД, иако потроши стотици милиони долари за да ѝ помогне на партијата.

Во вторникот, Демократите ја презедоа контролата врз Конгресот на САД, освојувајќи го и Сенатот и Претставничкиот дом – што претставува силно отфрлање на политичката агенда на претседателот Доналд Трамп.

„Изгледа дека моите вселенски ласери за мешање во изборите овој пат не проработеа“, напиша Маск на платформата X, додавајќи емоџи што означува кревање раменици.

Според податоците на „OpenSecrets“, организација која го следи финансирањето на политичките кампањи, Маск вложил речиси половина милијарда долари во републикански политички активности. Со тоа тој стана најголемиот поединечен донатор во еден федерален изборен циклус, откако во 2010 година беше дозволено неограничено трошење средства за изборни цели.

Неговите донации главно отидоа за „America PAC“, организација што ги поддржува Републиканците, како и за таканаречен „супер ПАК“ (комитет за политичко дејствување) познат како „Фонд за лидерство во Сенатот“ (Senate Leadership Fund – SLF).

Во септември, SLF искористи 158 милиони долари од донациите за да го поддржи Кен Пакстон, републиканскиот кандидат за Сенатот во Тексас.

Демократот Џејмс Таларико го победи Пакстон – близок сојузник на Трамп – и стана првиот Демократ што освоил функција на ниво на сојузна држава во Тексас уште од 1994 година.

На прославата на победата во Остин, Таларико се осврна на Маск. „Во оваа трка се соочивме со наши сопствени Голијати. Со најбогатиот човек на светот, најмоќниот човек на светот и цел естаблишмент од Вашингтон“, рече тој, пренесува АФП.